ශ්‍රී ලාංකික සම්භවයක් සහිත කාන්තාවකට ඔස්ට්‍රේලියා රජයෙන් ප්‍රබල තනතුරක්

සිම්මාබ්වේ හි ඔස්ට්‍රේලියා තානාපතිවරිය ලෙසට ශ්‍රී ලාංකික සම්භවයක් සහිත මිනෝලි පෙරේරා මහත්මිය පත්කර තිබෙනවා.

ඕස්ට්‍රේලියානු විදේශ කටයුතු අමාත්‍ය Penny Wong විසින් පසුගියදා කැන්බරා හි පැවති මාධ්‍ය හමුවකදී යි ඕස්ට්‍රේලියානු අගමැති Anthony Albanese විසින් ඇයව පත් කරනු ලැබූ බව ප්‍රකාශ කර ඇත්තේ.

කොංගෝ ප්‍රජාතන්ත්‍රවාදී ජනරජය, කොංගෝ – බ්‍රසාවිල්, මලාවි සහ සැම්බියාවට ද ඇය තානාපතිවරිය වශයෙන් කටයුතු කරනු ඇති.

ඒ අනුව මිනෝලි පෙරේරා, 2018 වසරේ සිට මේ වන විට සිම්බාබ්වේ තානාපතිවරයා ලෙස සේවය කරන බ්‍රොන්ටේ මවුල්ස්ගෙන් පසු ධුරයේ වැඩ භාර ගැනීමට නියමිතයි.

මෙම පත් කිරීම ඔස්ට්‍රේලියාව සිම්බාබ්වේ සමඟ ඇති ද්විපාර්ශවික සබඳතාව වැඩිදියුණු කිරීමට උත්සාහයක් බවයි විදේශ අමාත්‍යවරයා මාධ්‍යවේදීන්ට පැවසුවේ.

දේශගුණික විපර්යාස, තිරසාර සංවර්ධනය සහ ස්ත්‍රී පුරුෂ සමානාත්මතාවය ඇතුළුව දෙපාර්ශවය අතර උනන්දුවක් ඇති ප්‍රධාන කරුණු සම්බන්ධයෙන් අනෙක් රටවල් සමඟ සම්බන්ධ වීම මෙමගින් තවදුරටත් ශක්තිමත් කරන බව ඕස්ට්‍රේලියානු විදේශ කටයුතු අමාත්‍යවරයා පෙන්වා දෙනවා.

මිනෝලි පෙරේරා ඔස්ට්‍රේලියාවේ විදේශ කටයුතු හා වෙළඳ දෙපාර්තමේන්තුවේ ජ්‍යෙෂ්ඨ වෘත්තීය නිලධාරිනියක ද වනවා.

ඇය මීට පෙර බීජිං, පෝට් මෝර්ස්බි, නිව් යෝර්ක්, බුවනෝස් අයර්ස් සහ ටෙල් අවිව් හි සේවය කර ඇති බවයි වාර්තා වන්නේ.