පිටකොටුව හතර වන හරස් වීදියේ වසා තිබූ වෙළඳසැලක් ඉදිරිපිට සිටි පිරිසක් වෙත මෝටර් රථයක් කඩාවැදී සිදු වූ අනතුරකින් බරපතල තුවාල ලැබූ තිදෙනෙකු ජාතික රෝහලට ඇතුළත් කර තිබෙනවා.
පසුගිය 07 වනදා රාත්‍රියේ මෙම අනතුර සිදුව ඇති අතර එම පිරිස අතර සිටි එක් අයෙක් රථය කඩා වැදීමත් සමඟම පිටතට පැන දිවි බේරාගෙන තිබෙනවා.
මෝටර් රථය හිමි පුද්ගලයා ශාරීරික අවශ්‍යතාවයක් සඳහා ඉන් පිටව ගිය අවස්ථාවේදී ඒ තුළ සිටි ඔහුගේ මිතුරකු විසින් මෝටර් රථය පනගන්වා ධාවනය කිරීමට යාමේදී මෙම අනතුර සිදුව ඇති බවයි වාර්තා වන්නේ.
වෙළඳසැලක් ඉදිරිපිට බිම ඉඳගෙන කතාබස් කරමින් සිටි කම්කරුවන් පිරිසක් මෙම අනතුරට මුහුණ පා ඇති අතර, කුමාර වීදිය දෙස සිට අධික වේගයෙන් පැමිණි මෝටර් රථය ඔවුන් වෙත කඩා වැදී ඇති බව සඳහන්.
අනතුර සිදුවන අවස්ථාවේ දී රථය පැද වූ පුද්ගලයා අත්අඩංගුවට ගත් බවයි කොටුව පොලිසිය සඳහන් කළේ.
