ඉන්දුනීසියාවේ ලීග් පාපන්දු තරග තාවකාලිකව අත්හිටුවන ලෙසට එරට ජනාධිපති ජෝකෝ විඩෝඩෝ නියෝග කර තිබෙනවා.
ඒ, ඉන්දුනීසියාවේ නැගෙනහිර ජාවා ප්‍රදේශයේ පැවති පාපන්දු තරගයකින් පසු හටගත් කලහකාරී සිද්ධියෙන් පුද්ගලයින් 129 දෙනෙකු මියයාමෙන් අනතුරුවයි.
මෙම කලහකාරී සිද්ධිය සම්බන්ධයෙන් සිදුකරනු ලබන විමර්ශන අවසන් වන තුරු මෙලෙස ලීග් පාපන්දු තරග නොපවත්වන ලෙසයි ජනාධිපතිවරයා එරට බලධාරීන්ට දැනුම් දී ඇත්තේ.
ඉන්දුනීසියාවේ පාපන්දු කීර්තිනාමයට කළු පැල්ලමක් එක්කළ මෙම සිදුවීම සම්බන්ධයෙන් ඉන්දුනීසියානු පාපන්දු සංගමය විසින් ද විශේෂ පරීක්ෂණයක් ආරම්භ කර ඇති බවයි වාර්තා වන්නේ.
ඉන්දුනීසියාවේ ජාවා හි කන්ජූරුහන් ක්‍රීඩාංගනයේදී පැවති පාපන්දු තරගයක් අවසන් බවට විනිසුරු සංඥා කිරීමෙන් පසු එම තරගය නැරඹීමට පැමිණ සිටි ප්‍රේක්ෂකයින් 3000ක පමණ පිරිසක් ක්‍රීඩා පිටිය තුළට කඩාවැදී දෙපිරිසක් අතර ගැටුමක් ඇතිකරගෙන තිබෙනවා.
එහිදී තත්ත්වය පාලනය කිරීම සඳහා එරට ආරක්ෂක අංශ කදුළු ගෑස් සහ බැටන් පොලු ප්‍රහාර එල්ල කර ඇති බව සඳහන්.
ඒ, සමඟ කලබලයට පත් ප්‍රේක්ෂකයින් ක්‍රීඩාංගනයෙන් පිටව යාමට උත්සාහ දැරීමේදී තෙරපීමට ලක්වීමෙන් පුද්ගලයින් 129 දෙනෙකු ජීවිතක්ෂයට පත්ව තිබෙනවා.
මෙලෙස මියගිය පිරිස අතර ආරක්ෂක අංශ සාමාජිකයින් කිහිප දෙනෙක් ද සිටින බවයි විදෙස් වාර්තා සඳහන් කළේ.
