උපරිම සිල්ලර මිලට වඩා වැඩි මිලට බිත්තර අලෙවිකරන වෙළෙඳුන් සොයා දිවයින පුරා වැටලීම් ආරම්භ කර ඇති බව පාරිභෝගික සේවා අධිකාරිය පවසනවා.
එම අධිකාරිය සඳහන් කළේ එවැනි වෙළෙඳුන්ට සති අන්ත දිනවල දී අවවාද සිදුකර සඳුදා (හෙට 22) දිනයේ සිට නීතිමය පියවර ගැනීමට කටයුතු කරන බවයි.
බිත්තරයකට උපරිම සිල්ලර මිලක් නියම කරමින් පෙරේදා (19) රාත්‍රියේ අති විශේෂ ගැසට් නිවේදනයන් නිකුත් කළා.
මෙම ගැසට් නිවේදනයට අනුව දුඹුරු සහ රතු බිත්තරයක් රුපියල් 45ක් ලෙසත්, සුදු බිත්තරයක් රුපියල් 43ක් ලෙසත් උපරිම මිලක් නියම කර තිබෙනවා.
බිත්තරයක මිල රුපියල් පහකින් අඩුකරන බවට බිත්තර නිෂ්පාදකයින් පවසා තිබූ පසුබිමකයි මෙලෙස බිත්තර සඳහා උපරිම සිල්ලර මිලක් නියම කරනු ලැබුවේ.
කෙසේ වෙතත් බිත්තර නිෂ්පාදකයින් චෝදනා කරන්නේ මෙලෙස පනවා ඇති උපරිම සිල්ලර මිල බිත්තරයක් නිෂ්පාදිත පිරිවැයට ද වඩා අඩු අගයක් බවයි.
