ශ්‍රී ලංකා මහ බැංකුවට අනුව, පසුගිය වසරේ සැප්තැම්බර් මාසයට සාපේක්ෂව මෙම වසරේ සැප්තැම්බර් මාසයේ දී මෝටර් වාහන ආනයනය සඳහා ශ්‍රී ලංකාව දැරූ වියදම 34.4%කින් පහත වැටී තිබෙනවා.
‘බාහිර අංශයේ කාර්ය සාධනය’ පිළිබඳ නවතම වාර්තාවට අනුව, පෞද්ගලික සහ වාණිජ වාහන ඇතුළුව මෝටර් රථ ආනයනය සඳහා සැප්තැම්බර් මාසයේදී වැය කර ඇති මුදල ඇමරිකානු ඩොලර් මිලියන 188ක්.
මෙම පහත වැටීම, 2025 සැප්තැම්බර් මාසයට සාපේක්ෂව මාසික වාහන ආනයන වියදමේ සැලකිය යුතු අඩුවීමක් පෙන්නුම් කරනවා.
කෙසේ වෙතත්, සැප්තැම්බර් මාසයේදී මෙලෙස වියදම අඩු වුවද, 2026 වසරේ පළමු මාස නවය තුළ වාහන ආනයනය සඳහා ශ්‍රී ලංකාව වැය කර ඇති මුළු මුදල ඇමරිකානු ඩොලර් බිලියන 1.87ක් බවයි මහ බැංකුව සඳහන් කරන්නේ.
මේ අතර, පසුගිය 2025 වසරේ සැප්තැම්බර් මාසයේ දී ඇමරිකානු ඩොලර් බිලියන 2.05ක්ව පැවති සමස්ත භාණ්ඩ ආනයන වියදම, 2026 සැප්තැම්බර් මාසයේදී 2.9%කින් ඉහළ ගොස් ඇමරිකානු ඩොලර් බිලියන 2.11ක් දක්වා ළඟා වී තිබෙනවා.
2026 වසරේ ජනවාරි සිට සැප්තැම්බර් දක්වා කාලය තුළ සමස්ත ආනයන වියදම ඇමරිකානු ඩොලර් බිලියන 18.67ක් වූ අතර, එය 2025 වසරේ අදාළ කාලපරිච්ඡේදයට සාපේක්ෂව 21.3%ක වැඩිවීමක්.
