2024 අංක 44 දරන රාජ්‍ය මූල්‍ය කළමනාකරණ පනතේ 53(1) වගන්තිය අනුව, අවම වශයෙන් කාර්තුමය පදනමක් මත මුදල් විෂය භාර අමාත්‍යවරයා විසින් රජයේ ආදායම් සහ වියදම් ඇතුළු මූල්‍ය කාර්යසාධනය පිළිබඳ ප්‍රකාශයක් කාර්තුව අවසන් වී දින 45කට නොඅඩු කාලයක් තුළ දී අමාත්‍ය මණ්ඩලය වෙත ඉදිරිපත් කළ යුතු වනවා.
පෙබරවාරි මස 09 වැනි දින පැවති කැබිනට් මණ්ඩල සාකච්ඡාවේ දී එම විධිවිධාන පරිදි 2024- 12- 31 දිනෙන් අවසන් වන 2024 හතරවන කාර්තුව සඳහා වන මූල්‍ය කාර්යසාධන ප්‍රකාශය 2025 – 02 – 14 දින හෝ ඊට පෙර අමාත්‍ය මණ්ඩලය වෙත ඉදිරිපත් කළ යුතු බවයි එහිදී ප්‍රකාශ කෙරුණේ.
ඒ අනුව, මුදල්, ක්‍රමසම්පාදන සහ ආර්ථික සංවර්ධන අමාත්‍ය වශයෙන් ජනාධිපතිවරයා විසින් ඉදිරිපත් කළ 2024 වර්ෂය සඳහා වන වාර්ෂික අයවැය ඇස්තමේන්තුවල දක්වා ඇති වර්ගීකරණයන් මත පදනම්ව 2024 12 – 31 දිනෙන් අවසන් වන හතරවන කාර්තුව දක්වා සියලුම විශේෂ වියදම් ඒකක, අමාත්‍යාංශ, දෙපාර්තමේන්තු සහ දිස්ත්‍රික් ලේකම් කාර්යාල මගින් වාර්තා කරන ලද සමුච්චිත ආදායම් සහ වියදම් ඇතුළත්ව සකස් කරනු ලැබ ඇති මූල්‍ය කාර්යසාධනය පිළිබඳ වාර්තාව අමාත්‍ය මණ්ඩලය විසින් සැලකිල්ලට ගනු ලැබූ බවත් වාර්තා වනවා.
එහි සඳහන් වන ආකාරයට 2024 වසරේ සමස්ත රාජ්‍ය ආදායම රුපියල් ට්‍රිලියන 4.14ක් වන අතර එය 2023 වර්ෂයට සාපේක්ෂව සියයට 22.7ක රාජ්‍ය ආදායමේ වර්ධනයක් පෙන්නුම් කරන බවයි වාර්තා වන්නේ.
