ශ්‍රී ලංකාවේ මෙම වසර තුළ දී සිදු වූ අපරාධමය සිදුවීම් සම්බන්ධයෙන් ශ්‍රී ලංකා මානව හිමිකම් කොමිෂන් සභාව විසින් විශේෂ නිවේදනයක් නිකුත් කර තිබෙනවා.
සැකකරුවන් පොලිස් අත්අඩංගුවේ සිටියදී සිදු වූ වධහිංසා පැමිණවීම්, භාරකාරීත්වයේ ගැටලු මෙන් ම පුද්ගල මරණ සම්බන්ධයෙන් මෙම වසරේ දී පැමිණිලි 200කට අධික සංඛ්‍යාවක් ලැබී ඇති බවටයි ශ්‍රී ලංකා මානව හිමිකම් කොමිෂන් සභාව සඳහන් කරන්නේ.
අදාළ තොරතුරු සඳහන් කරමින් ඊට අදාළ ලිපියක් මානව හිමිකම් කොමිෂන් සභාව විසින් ජනාධිපති රනිල් වික්‍රමසිංහ, අධිකරණ අමාත්‍ය සහ මහජන ආරක්ෂක අමාත්‍ය වෙත දයොමු කර තිබෙනවා.
ශ්‍රී ලංකා මානව හිමිකම් කොමිෂන් සභාව නිරීක්ෂණය කර ඇත්තේ මෙලෙස පැමිණිලි ලැබුණු වධහිංසා 200කට අධික සංඛ්‍යාව ම වසරේ මුල් මාස 06 තුළ ලැබී ඇති බවයි.
එහිදී භාරකාරීත්වය යටතේ සිටියදී සිදු වූ මරණ 06ක්, රඳවා තබාගත් කාලය තුළ දී සිදු වූ මරණ 02ක් සම්බන්ධයෙන් මානවහිමිකම් කොමිෂන් සභාව වෙත පැමිණිලි ලැබී තිබෙනවා.
සැකකරුවෙකු පොලිස් භාරයේ සිටියදී සිදුවන වධහිංසා පැමිණවීම් සහ සෙසු ගැටලු සම්බන්ධයෙන් ජාත්‍යන්තර මානව හිමිකම්දිනයට සමගාමී ව දෙසැම්බර් 11 වැනි දින භාරකාරත්වය තුළ දී සිදුවන මරණ වැළැක්වීම සඳහා ශ්‍රී ලංකා පොලිසිය වෙත මානව හිමිකම් කොමිෂන් සභාව මගින් කෙටුම්පත් පිළිබඳ මාර්ගෝපදේශ සහ නිර්දේශ ඇතුළත් වාර්තාවක් ද ලබාදෙනු ලැබුවා.
ශ්‍රී ලංකා පොලිසිය වෙත ලබා දුන් අදාළ මාර්ගෝපදේශ වාර්තාව සම්බන්ධයෙන් මානව හිමිකම් කොමිෂන් සභාව නීතිපතිවරයාගේ ප්‍රතිපෝෂණය ද ඉල්ලා සිටියා.
ශ්‍රී ලංකා මානව හිමිකම් කොමිෂන් සභාව වධහිංසාවට එරෙහි ව නිකුත් කළ මාර්ගෝපදේශ වාර්තාවට ඔප්ෂනල් ප්‍රොටෝකෝලය අනුමත කිරීමෙන් අනතුරුව අමාත්‍ය මණ්ඩලයේ තීරණයක් මගින් රජය විසින් වධහිංසාව පිළිබඳ ජාතික වැළැක්වීමේ යාන්ත්‍රණය(NPM) ලෙස එය නම් කරනු ලැබුණා.
එය මානව හිමිකම් කොමිෂන් සභාව 2022 පෙබරවාරි මාසයේදී NPM ලෙස විධිමත් ලෙස ස්ථාපිත කිරීමටයි කටයුතු කළේ.
එතැන් සිට, අභියෝග හඳුනා ගැනීම සහ වධහිංසා පැමිණවීම වැළැක්වීම සඳහා සුදුසු නිර්දේශ ඉදිරිපත් කිරීමේ අරමුණින් එයපොලිස් ස්ථාන ඇතුළු රැඳවුම් ස්ථාන වෙත ලබා දී ක්‍රියාත්මක වෙමින් තිබෙනු දැකිය හැකියි.
මෙලෙස වධහිංසා ලැබූවන්, හිංසනයන්ට ලක් වූවන් හට එම අපරාධමය ක්‍රියාවන් කළ පුද්ගලයින්ට එරෙහි ව නඩු පැවරීමට ද ශ්‍රී ලංකා මානව හිමිකම් කොමිෂන් සභාව කටයුතු කරන බවයි මෙම නිවේදනයේ දැක්වෙන්නේ.
