ප්රබල චෙන්නායි සුපර් කිංග්ස් කණ්ඩායමේ නායකත්වයේ වෙනසක් සිදුකරමින් යළිත් එහි වගකීම මහේන්ද්ර සිං දෝනි වෙත පවරන්නට එම කණ්ඩායමේ හිමිකාරිත්වය පසුගිය දා කටයුතු කළා.
ඒ අනුව චෙන්නායි සුපර් කිංග්ස් කණ්ඩායමේ නායකත්වයට මහේන්ද්ර සිං දෝනි යළිත් පත්වීමත් සමඟ එම කණ්ඩායම සහභාගී වූ පළමු තරගයෙන් ම සුපිරි ජයක් ලබන්නට එම කණ්ඩායමට ඊයේ (01) රාත්රියේ හැකියාව ලැබුණා.
චෙන්නායි ක්රීඩකයින් මෙම ජයග්රහණය වාර්තා කළේ ඊයේ රාත්රියේ පූනේ හිදී පැවති තරගයෙන් මේ වනවිට ප්රසාද ලකුණු සටහනේ සිව්වන ස්ථානයේ පසුවන සන්රයිසස් හයිද්රාබාද් කණ්ඩයම ලකුණු 13කින් පරාජය කරමින්.
මෙවර තරගාවලියේ දී මහේන්ද්ර සිං දෝනිට නායකත්වය ලබාදීමට පෙර චෙන්නායි කණ්ඩායම මෙහෙයවනු ලැබුවේ තුන් ඉරියව් ක්රීඩක රවීන්ද්ර ජඩේජා විසින්.
නායකත්වයේ වගකීම දෝනිට පවරන අවස්ථාවේ දී ජඩේජා පවසා තිබුණේ සිය දක්ෂතා කෙරෙහි වැඩි අවදානයක් යොමු කිරීමේ අරමුණින් එම වගකීමෙන් තමන් බැහැරවන බවයි.
වසර 15ක් පුරා අඛණ්ඩව දිග හැරෙන ඉන්දීය ප්රිමියර් ලීග් තරගමාලාවේ චෙන්නායි කණ්ඩායම ආරම්භයේ සිටම නායකත්වය හොබවනු ලැබුවේ මහේන්ද්ර සිං දෝනි විසින් වීම විශේෂත්වයක්.
දෝනිගේ නායකත්වය යත්තේ චෙන්නායි පිල ඉන්දීය ප්රිමියර් ලීග් ශූරතාවය සිව්වරක් ජයග්රහණය කර ඇති අතර නිමා වූ 2021 වසරේ ශූරතාවය හිමිකර ගනු ලැබුවේ ද චෙන්නායි සුපර් කිංග්ස් කණ්ඩායමයි.
කෙසේ වෙතත් විචාරකයින් පවසන්නේ මහේන්ද්ර සිං දෝනි තීක්ෂණ බුද්ධියකින් යුත් වාසනාවන්ත නායකයෙකු බවයි.
මෙවර ඉන්දීය ප්රිමියර් ලීග් තරගවලියේ චෙන්නායි කණ්ඩායම මේ වනවිට තරග 09කට සහභාගී වී ජයග්රහණය කර ඇත්තේ තරග 03ක් වන අතර ඔවුන් ප්රසාද ලකුණු සටහනේ පසුවන්නේ 09 වන ස්ථානයේයි.
චෙන්නායි ක්රීඩකයින් ඊයේ ලද මෙම ජයග්රහණය එම කණ්ඩායමේ හිමිකරිත්වයට සියුම් අස්වැසිල්ලක් වනු ඇති බවයි තරගාවලියේ විස්තර විචාරකයින් පවසා සිටියේ.
