බුලත්සිංහල නගරයේ බස් නැවතුම්පොළේ සිටි 18 හැවිරිදි සිසුවෙකු පැහැරගෙන ගොස් ඇඳ සිටි කමිසය ගලවා දෑත් බැඳ ඔහු ගෙළ පැළඳ සිටි රන් මාලය කොල්ල කා පළා ගොස් ඇති බව බුලත්සිංහල පොලිසිය පවසනවා.
මෙම සිසුවා ඊයේ (29) සවස අමතර පන්ති නිමව නිවස කරා යෑමට බස්නැවතුමේ රැඳී සිටියදී මෙම සිදුවීමට මුහුණ දී ඇති බවයි වාර්තා වන්නේ.
යතුරුපැදියකින් පැමිණි පුද්ගලයන් දෙදෙනෙක් “අපි වලානේ යුනිට් එකෙන් ” බව පවසමින් සිසුවාව පරීක්ෂා කිරීමට අවශ්‍ය බව පවසා යතුරුපැදියේ මැද නංවාගෙන දොඩම්ගොඩ ප්‍රදේශයේ පාළු රබර් වත්තකට රැගෙන ගොස් තිබෙනවා.
එහිදී සිසුවාගේ කමිසය ගලවා අත්දෙක බැඳ පැළඳ සිටි රන්මාලය කොල්ල කා සැකකරුවන් දෙදෙනා පළාගොස් ඇති බවයි පොලිසිය සඳහන් කළේ.
මෙලෙස කොල්ල්ල කෑමට ලක්වූ සිසුවා බුලත්සිංහල, ගෝවින්න ප්‍රදේශයේ පදිංචිකරුවෙක්.
කළුතර දිසාව භාර නියෝජ්‍ය පොලිස්පතිවරයාගේ උපදෙස් පරිදි මෙම සිද්ධිය පිළිබඳව විමර්ශන අරඹා තිබෙනවා.
