දියතලාව ෆොක්ස් හිල් මෝටර් රථ ධාවන පථයේදී සිදුවූ බිහිසුනු අනතුරෙන් මියගිය කිහිපදෙනෙකුගේ සිරුරු ඔවුන්ගේ ඥාති නිවෙස් වෙත ඊයේ (22) පස්වරුවේ රැගෙන එනු ලැබුවා.
මේ අතර සිද්ධියෙන් තුවාල ලැබූ තවත් පිරිසක් දියතලාව සහ බදුල්ල රෝහල්වල තවදුරටත් ප්‍රතිකාර ලබමින් සිටිනවා.
පෙරේදා සිදුවූ මෙම මෝටර් රථ අනතුරෙන් වැලිමඩ, ඩයරබා වතුයායේ පදිංචි 55 හැවිරිදි මුත්තුසාමි උදයකුමාර් සහ ඔහුගේ මිණිපිරිය වන 08 හැවිරිදි ශිව කුමාර් දිනූෂිකා ද මියගිය අතර ඔවුන්ගේ සිරුරු ඊයේ (22) පස්වරුවේ නිවෙස් වෙත රැගෙනු
එනු ලැබුවා.
දිනුෂිකාගේ මව මීට පෙර මියගොස් ඇති අතර, ඇය හැදී වැඩී ඇත්තේ අනතුරින් මියගිය සීයා සහ මිත්තණිය සෙවනේයි.
ඇය මෝටර් රථ ධාවන තරග සදහා ඇති දැඩි කැමැත්ත නිසාවෙන්ම බස් රථයක නැගී දියතලාවට ගොස් තරග නරඹමින් සිටිය දී මෙම අවාසනාවන්ත ඉරණමට මුහුණ පා තිබුණා.
මේ අතර අදාල අනතුරින් මියගිය අකුරැස්ස වලව්වත්තේ පදිංචිව සිටි 20 හැවිරිදි අශේන් හීනයටිගලගේ සිරුරු ද සිය නිවෙස වෙත රැගෙන එනු ලැබුවා.
මෙම අනතුරෙන් මාතර – කාලිදාස පාරේ පදිංචි උපාලි ගමගේ සහ ගොඩගම පදිංචි ගනේෂ් ජයවර්ධන යන මිතුරන් දෙදෙනා ද මියගිය අතර, ඔවුන්ගේ දේහයන් එකම වේලාවක එකම ස්ථානයක මිහිදන් කිරීමට දෙපාර්ශවයේ ඥාතීන් තීරණය කර තිබෙනවා.
ඒ, පාසල් වයසේ සිට ගජ මිතුරන් වූ මොවුන් දෙදෙනාට ගෞරවයක් ලෙසයි.
මේ අතර අනතුර සම්බන්ධයෙන් පරීක්ෂණ පැවැත්වීම සඳහා කමිටුවක් පත් කිරීමට ශ්‍රී ලංකා යුද හමුදාව තීරණය කර තිබෙනවා.
මෙම කමිටුවට සාමාජිකයින් හත්දෙනෙක් ඇතුළත්.
