වංචනික පිරිසක් දේශීය ආදායම් දෙපාර්තමේන්තුවේ නිලධාරින් ලෙස පෙනී සිටිමින් ව්‍යාපාරික ස්ථානවලට ගොස් බදු මුදල් රැස් කරන බවට පැමිණිලි ලැබෙමින් පවතින බව දේශීය ආදායම් දෙපාර්තමේන්තුව පසනවා.
කොළඹ, පානදුර, මීගමුව, වෙන්නප්පුව, මිනුවන්ගොඩ යන ප්‍රදේශවලින් මෙම පැමිණිලි ලැබී ඇති බවයි එම දෙපාර්තමේන්තුව සඳහන් කළේ.
බදු මුදල් රැස් කිරීමේ දී දේශීය ආදායම් නිලධාරීන්, බදු ගෙවන්නන් වෙත ගොස් දේශීය ආදායම් කොමසාරිස් ජනරාල් නමින් පවත්වාගෙන යන බැංකු ගිණුම්වලට පමණක් බදු මුදල් තැන්පත් කිරීමට උපදෙස් දෙන බවයි දැනුම් දෙන්නේ.
කිසිම අවස්ථාවක මුදල් හෝ චෙක්පත් එකතු කිරීමක් මඟින් බදු එකතුකර ගැනීමක් සිදු නොකරන බව ද එම දෙපාර්තමේන්තුව සඳහන් කරනවා.
වංචනික ලෙස බදු මුදල් එකතුකරන මෙම පුද්ගලයින් සම්බන්ධයෙන් පොලිසියට දැනුම් දෙන ලෙසත් එවැනි පුද්ගලයින් වෙත මුදල් ලබානොදන ලෙසත් දේශීය ආදායම් දෙපාර්තමේන්තුව ජනතාවට දැනුම් දෙනවා.
