ශ්‍රී ලංකා නවක ක්‍රීඩක මිලාන් රත්නායක ජාත්‍යන්තර ටෙස්ට් පන්දු යවන්නන්ගේ ශ්‍රේණිගත කිරීම්හි මුල් 100 දෙනා අතරට පැමිණීමට සමත් ව තිබෙනවා.
ICC කවුන්සිලය විසින් පෙරේදා (10) දිනයේ දී සිදු කරන ලද නවතම යාවත්කාලීන කිරීම්වලට අනුවයි මිලාන් හට ලොව හොඳම පන්දු යවන්නන් 100 දෙනා අතර 84 වැනි ස්ථානය හිමි ව ඇත්තේ.
මිලාන් රත්නායක මෙම දක්ෂතාව දැක්වූයේ පසුගියදා නිමාවට පත් වූ එංගලන්තයට එරෙහිව පැවති තරග තුනකින් සමන්විත ටෙස්ට් තරගාවලියේ දීයි.
එය ඔහුගේ මංගල ටෙස්ට් තරගය ද වූ අතර; සිය මංගල ටෙස්ට් තරගයේ දී ද මිලාන් රත්නායක පළමු ජාත්‍යන්තර ටෙස්ට් අර්ධ ශතකය ( ලකුණු 72ක්) ද වාර්තා කිරීමට සමත් වුණා.
එමෙන්ම ඔහු තරග 03ක දී කඩුලු 10ක් දවාගත්තේ ඉනිම් 06කට් ක්‍රීඩා කරමින්.
ඒ අනුව ඔහුට ප්‍රසාද ලකුණු 269ක් හිමි ව තිබෙනවා.
ටෙස්ට් තුන්ඉරියව් ක්‍රීඩකයින් ශ්‍රේණිගත කිරීම්හි 50 වන ස්ථානය දක්වා ද මෙම නවක ක්‍රීඩකයා ඉදිරියට පැමිණ තිබීම දැකිය හැකියි.
මේ අතර එංගලන්ත තරගාවලිය තුළ දී කඩුලු දවා ගැනීමේ දී කැපී පෙනුණු ළහිරු කුමාර ද පන්දු යවන්නන් අතර ශ්‍රේණිගත කිරීම් හි ස්ථාන 10ක් ඉහළට පැමිණ 32 වැනි ස්ථානය හිමිකරගෙන සිටිනවා.
