හෙද පුහුණුවට බඳවා ගැනීම සඳහා සම්මුඛ පරීක්ෂණ 2024 වසරේ ජනවාරි මස 13 වනදා දින සිට පෙබරවාරි මස 18 වනදා දක්වා පැවැත්වීමට සෞඛ්‍ය අමාත්‍යංශය සැලසුම් කර තිබෙනවා.
මෙරට රජයේ රෝහල්වල රෝගී සත්කාර හා ප්‍රතිකාර සේවාවන් වඩාත් ගුණාත්මකව විධිමත්ව ඉදිරියට පවත්වා ගෙන යාම සඳහා මානව සම්පත සංවර්ධනය කිරීම වෙනුවෙන් ගත යුතු ඉදිරි ක්‍රමවේද පිළිබඳ කරුණු සොයා බැලීම සදහා විශේෂ සාකච්ජාවක් සෞඛ්‍ය අමාත්‍ය වෛද්‍ය රමේෂ් පතිරණගේ ප්‍රධානත්වයෙන් සෞඛ්‍ය අමාත්‍යංශයේ දී පැවැත්වුණා.
මෙහිදී, අයදුම්පත් යොමු කළ හෙද අපේක්ෂකයින්ගේ සම්මුඛ පරීක්ෂණ කඩිනමින් පවත්වා ඔවුන් හෙද පුහුණූවට ඇතුලත් කිරීමට පියවර ගන්නා ලෙසටයි අමාත්‍යවරයා අදාළ නිලධාරීන්ට උපදෙස් ලබා දී ඇත්තේ.
ඒ අනුව 2019/2020 උසස් පෙළ විද්‍යා සහ ගණිත අංශ විෂය ධාරාවලින් සමත්වී හෙද පුහුණුව සඳහා අයදුම්පත් යොමු කරන ලද අයදුම්කරුවන් පුහුණුවට තෝරා ගැනීමට මූලික සුදුසුකම් පරීක්ෂා කිරීමේ සම්මුඛ පරීක්ෂණ ජනවාරි 13 වනදා සිට පෙබරවාරි 18 වනදා දක්වා පැවැත්වීමට සෞඛ්‍ය අමාත්‍යංශය සැලසුම් කර තිබෙනවා.
මෙම සම්මුඛ පරීක්ෂණ සෞඛ්‍ය අමාත්‍යංශයේ හා දිවයින පුරා හෙද විදුහල්වල පැවැත්වීමට සැලසුම් කර ඇති අතර අයදුම්කරුවන් 4000කට අධික ප්‍රමාණයක් මේ සඳහා අයදුම්කර ඇතැයි සඳහන්.
මේ සම්බන්ධයෙන් වැඩි විස්තර මෙම දෙසැම්බර් මස 27 වනදායින් පසු සෞඛ්‍ය අමාත්‍යංශයේ නිල වෙබ් පිටුවේ (https://www.health.gov.lk/) පලකිරීමට කටයුතු කරන අතර අයදුම්කරුවන්ට එම වෙබ් පිටුව පරිශීලනය කර අවශ්‍ය තොරතුරු ලබා ගන්නා ලෙසටයි සෞඛ්‍ය අමාත්‍යංශය දැනුම් දෙන්නේ.
මේ වන විට දිවයින පුරා සෞඛ්‍ය ක්ෂේත්‍රයේ හෙද නිලධාරීන් 45,000කට අධික ප්‍රමාණයක් සේවය කරනවා. දිවයින පුරා හෙද පුහුණු පාසල් 17ක හෙද සිසු සිසුවියන් 6500කට අධික ප්‍රමාණයක් පුහුණු පාඨමාලාවල ද නිරත වනවා.
