ඊශ්‍රායල – හිස්බුල්ලා නො නවතින සටන් මේ වනවිට (23) තවදුරටත් තීව්‍ර වෙමින් පවතින අතර; අද දිනයේ ද එල්ල කළ මාරාන්තික ගුවන් ප්‍රහාර මාලාවකින් ලෙබනනයේ පුද්ගලයින් 182 දෙනෙකු ජීවිතක්ෂයට පත් ව තිබෙනවා.
අල් ජසීරා මාධ්‍ය වාර්තා කරන්නේ; ලෙබනන සෞඛ්‍ය අමාත්‍යාංශය පවසන පරිදි ඊශ්‍රායල ප්‍රහාරවලින් අද දිනයේ දී තවත් පුද්ගලයින් 700කට වැඩි පිරිසක් තුවාල ලබා ඇති බවයි.
පසුගිය වසරේ සිට දිනෙන් දින වර්ධනය වෙමින් පවතින ඊශ්‍රායල – හිස්බුල්ලා ගැටුම් තීව්‍ර වීම ආරම්භ වන්නේ ගාසා තීරයේ පලස්තීන හමාස් සටන්කාමීන්ට ලෙබනනයේ හිස්බුල්ලාවරුන් සහාය දැක්වීමත් සමගින් බවයි විදෙස් මාධ්‍ය වාර්තා කරන්නේ.
ඊශ්‍රායලය විසින් හිස්බුල්ලාවරුන්ට පසුගිය වසරට සාපේක්ෂව එල්ල කරන ලද දරුණුතම ප්‍රහාරය මෙය බවට ද වාර්තා වනවා.
දකුණු ලෙබනනයේ පුරවැසියන්ට ඉරානයේ පිටුබලය ලබන කණ්ඩායම සිටින ස්ථානවලින් ඉවත් වන ලෙස අනතුරු ඇඟවීමේ දුරකථන පණිවිඩ ලැබී ඇති හෙයින් හිස්බුල්ලා සංවිධානයට එරෙහි සිය ප්‍රහාර “පුළුල්” කරන බවට ඊශ්‍රායලය පවසා තිබෙනවා.
ලෙබනනයේ අග්‍රාමාත්‍යවරයා පවසන්නේ ඊශ්‍රායලයේ ක්‍රියාවන් “සමූලඝාතන යුද්ධයක්” බවයි.
