හිමිනමකගෙන් පහරකෑමට ලක්වූ පොලිස් නිලධාරියා ජීවිතක්ෂයට

දෙනියාය පල්ලෙගම ප්‍රදේශයේදී හිමිනමක් තියුණු ආයුධයකින් කළ පහරදීමෙන් තුවාල ලබා සිටි පොලිස් කොස්තාපල්වරයා ජීවිතක්ෂයට පත්වී තිබෙනවා.

කරාපිටිය ශික්ෂණ රෝහලේ ප්‍රතිකාර ලබමින් සිටියදී අද උදෑසන මෙම නිලධාරියා මියගොස් ඇති බව පොලිසිය සඳහන් කළා. මියගොස් ඇති පොලිස් නිලධාරියා දෙනියාය පොලිසියේ විවිධ පැමිණිලි අංශයේ රාජකාරියේ නිරත වූ කටුවන ප්‍රදේශයේ පදිංචි 37 හැවිරිදි තිදරු පියෙක්.

සිද්ධියට අදාළ සැකකාර 18 හැවිරිදි හිමිනම දෙනියාය පොලිසිය මගින් සිද්ධිය සිදු වූ 16 වනදා අත්අඩංගුවට ගෙන 17 වනදා මොරවක මහේස්ත්‍රාත් අධිකරණයට ඉදිරිපත් කිරීමෙන් පසු ලබන 29 වනදා දක්වා රක්ෂිත බන්ධානාගාර ගත කරනු ලැබුවා.

දෙනියාය පල්ලේගම ප්‍රදේශයේදී කළ පහරදීමෙන් බරපතළ තුවාල ලැබූ පොලිස් නිලධාරියා දෙනියාය මූලික රෝහලට ඇතුළත් කිරීමෙන් පසුවයි වැඩිදුර ප්‍රතිකාර සඳහා කරාපිටිය ශික්ෂණ රෝහලට මාරු කර යවා තිබුණේ.

යතුරුපැදියෙන් ගමන් කරමින් සිටියදී පල්ලේගම ප්‍රදේශයේ විහාරස්ථානයක වැඩ වසන වයස අවුරුදු 18ක් පමණ වන හිමිනමක් විසින් පල්ලේගම ගංගොඩ පාර පිහිටි සම්බෝධි වැඩිහිටි නිවාස⁣ය අසළදී 16 වනදා පස්වරුවේ පොලිස් නිලධාරියාගේ ගෙල ප්‍රදේශයට තියුණු ආයුධයකින් පහරදී තිබුණා.

ඉන් බරපතල තුවාල ලැබූ නිලධාරියා කඩිනමින් දෙනියාය මූලික රෝහලට ඇතුලත් කිරිමෙන් අනතුරුවයි වැඩිදුර ප්‍රතිකාර සඳහා කරාපිටිය රෝහල වෙත යොමු කර තිබුණේ.

මෙලෙස පහරකෑමට ලක්වූ පොලිස් නිලධාරියා කටුවන ප්‍රදේශයේ පදිංචි විවාහක නිලධාරියෙකු වන අතර ඔහු සැකකාර හිමි නමගේ වයස අවුරුදු 20ක් වන සහෝදරියක සමග ප්‍රේම සම්බන්ධතාවයක් පවත්වාගෙන ගොස් ඇතැයි සඳහන්.

ඔහු අදාළ තරුණියගේ නිවසට ගොස් සිටියදී සැකකාර හිමිනම නිලධාරියාට දුරකථනයෙන් පණිවුඩයක් ලබා දී ඇති අතර ඒ අනුව හිමිනම සහ පොලිස් නිලධාරියා පල්ලේගම ගංගොඩ පාර පිහිටි සම්බෝධි වැඩිහිටි නිවාසය අසළදී හමුවී තිබෙනවා.

එම අවස්ථාවේ සිදුවූ බහින් බස්විමකින් පසුව සැකකාර හිමිනම බෑගයේ සඟවා ගෙන සිටි තියුණු ආයුධයකින් පොලිස් නිලධාරියාගේ ගෙල ප්‍රදේශයට පහර ඇති බවටයි පොලිස් පරීක්ෂණවලදී හෙළිවී ඇත්තේ.