හිටපු පොලිස්පති සී.ඩී. වික්‍රමරත්නගේ අවසන් කටයුතු බොරැල්ල සුසාන භූමියේ දී සිදු කෙරේ

හිටපු පොලිස්පති සී.ඩී. වික්‍රමරත්නගේ දේහය පිළිබඳ අවසන් කටයුතු අද (20) පස්වරුවේ බොරැල්ල පොදු සුසාන භූමියේ දී සිදු කෙරුණා.

එම අවසන් කටයුතු සිදු කෙරුනේ පූර්ණ පොලිස් ගෞරව සහිතවයි.

හිටපු පොලිස්පති සී.ඩී. වික්‍රමරත්න පසුගිය සිකුරාදා (17) වෙඩි වැදීමකින් මියගොස් තිබුණා.

ඔහුගේ මරණය සියදිවි හානි කර ගැනීමක් බවට සැක කෙරෙන අතර, සිය ආරක්ෂක නිලධාරියාගේ ගිනි අවියෙන් ඔහු වෙඩි තබාගෙන ඇති බවට පොලිසිය සැක පළ කරන්නේ.

ඔහුගේ දේහය සම්බන්ධයෙන් සිදුකළ පශ්චාත් මරණ පරීක්ෂණයේ දී විවෘත තීන්දුවක් ලබාදී තිබෙනවා.

පරීක්ෂණ කටයුතු අවසන් වීමෙන් පසු ඔහුගේ දේහය බොරැල්ලේ පිහිටි පෞද්ගලික මල් ශාලාවක් වෙත රැගෙන ආ අතර, ඊයේ (19) පෙරවරුවේ සිට දේහය මහජන ගෞරවය සඳහා එහි තැන්පත් කෙරුණා.

අද (20) පස්වරුව දක්වා දේහය එම පෞද්ගලික මල් ශාලාවෙර් තැන්පත් කර තිබූ අතර දේහයට අවසන් ගෞරව දැක්වීම දේශපාලන නායකයින්, දේශපාලන නියෝජිතයින්, උසස් පොලිස් නිලධරීන් ඇතුළු විශාල පිරිසජ එම දින දෙක තුළ පැමිණියා.

මෙරට 35 වන පොලිස්පතිවරයා ලෙස කටයුතු කළ සී.ඩී. වික්‍රමරත්න මියයන විට 63 හැවිරිදි වියේ පසු වූ අතර, ඔහු 1986 වසරේ පොලිස් සේවයට එක්ව තිබුණා.

පාස්කු ඉරුදින ත්‍රස්ත ප්‍රහාරයෙන් අනතුරුව එවකට පොලිස්පති පූජිත් ජයසුන්දරගේ සේවය අත්හිටුවීමත් සමඟ වැඩබලන පොලිස්පතිවරයා ලෙස සී.ඩී. වික්‍රමරත්න පත් කෙරුණු අතර, 2020 වසරේ නොවැම්බර් 27 වනදා ඔහු පොලිස්පති ධුරයට පත් කරනු ලැබුවා.

2023 වසරේ නොවැම්බර් 23 වනදා ඔහු පොලිස්පති ධුරයෙන් විශ්‍රාම ගනු ලැබුවා.