හිටපු ජනාධිපති රනිල් වික්‍රමසිංහ මහතාගේ අත්සනින් යුත් ලිපි ශීර්ෂයක් යොදාගෙන ආරක්ෂක අංශ වෙත නිකුත් කර ඇතැයි කියන විශේෂ නියෝගයක් ඇතුළත් ලිපියක් සම්බන්ධයෙන් විමර්ශනයක් ආරම්භ කර ඇති බව වාර්තාවක් ගොනු කරමින් අපරාධ පරීක්ෂණ දෙපාර්තමේන්තුව කොටුව මහේස්ත්‍රාත් නිලුපුලී ලංකාපුර මහත්මියට දන්වා තිබෙනවා.
දකුණු පළාතේ ජාවාරම්කරුවෙකුට ඔහුගේ ජාවාරම කරගෙන යාමට ඉඩ ලබා දෙන ලෙසට කරුණු ඇතුළත් කරමින් හිටපු පොලිස්පති සී.ඩී වික්‍රමරත්න මහතාට, එවකට ආරක්ෂක ලේකම්වරයාට සහ ජනාධිපති ලේකම්වරයාට මෙම නියෝග සහිත ලිපිය යවා ඇති බවත් එම ලිපිය සත්‍ය එකක් ද එසේත් නැතිනම් අසත්‍ය එකක් ද යන්න සෙවීම සඳහා විමර්ශන ආරම්භ කර ඇති බවත් අපරාධ පරීක්ෂණ දෙපාර්තමේන්තුව කරුණු දක්වමින් මහේස්ත්‍රාත්වරිය දැනුවත් කර තිබෙනවා.
මෙම ලිපිය මාතර තැපැල් කාර්යාලයෙන් යොමුකර ඇති බවත් හිටපු පොලිස්පති සී.ඩී වික්‍රමරත්න මහතා ද ලිපිය සම්බන්ධයෙන් විමර්ශනයක් සිදු කරන ලෙස නියෝග කර ඇති බවත් අපරාධ පරීක්ෂණ දෙපාර්තමේන්තුව කරුණු දක්වා තිබෙනවා.
ඉදිරිපත් කරුණු සියල්ල සළකා බැලීමෙන් අනතුරුව මෙම ලිපිය ව්‍යාජ එකක් ද එසේත් නැතිනම් සත්‍ය එකක් ද යන්න පිළිබඳව විමර්ශනය කර අධිකරණයට වාර්තාවක් ගොනු කරන ලෙස මහේස්ත්‍රාත්වරිය විසින් විමර්ශන නිළධාරීන්ට නියෝග කර තිබෙනවා.
