හිටපු ජනාධිපති මෛත්‍රීපාල සිරිසේන මහතා අද යාපනය දිස්ත්‍රීක්කයේ සංචාරයකට එක්වී තිබෙනවා.
අප වාර්තාකරුවන් සඳහන් කළේ හිටපු ජනාධිපතිවරයා පළමුව ආගමික නායකයින් හමුවී ආශිර්වාද ලබාගැනීම සිදු වූ බවයි.
පළමුව යාපනය නාග විහාරයට ගිය මෛත්‍රීපාල සිරිසේන මහතා විසින් ආගමික වතාවත්වල නිරත වෙමින් නාග විහාරයේ විහාරාධිපති පූජ්‍ය මිගහජඳුරේ සිරිවිමල නායක හිමියන්ගෙන් ආශිර්වා ද ලබා ගනු ලැබුවා.
අනතුරුව යාපනය රදගුරු නිවසේදී යාපනය රදගුරු ජස්ටින් ඥාන ප්‍රකාශම් පියතුමන් හමු වූ ඔහු උන් වහන්සේගෙන් ආශිර්වාද ලබාගෙන තිබෙනවා.
අනතුරුව යාපනය නල්ලූර් කෝවිලට පැමිණි හිටපු ජනාධිපතිවරයා කෝවිලේදී විශේෂ දේව මෙහෙයකට ද සහභාගී වුණා.
හිටපු ජනාධිපති මෛත්‍රීපාල සිරිසේන මහතා සහ යාපනයේ හින්දු ආගමික නායකයින් අතර සාකච්ඡාවක් පැවත්වීමට ද නියමිතව ඇති අතර පසුව යාපනය ජුම්මා පල්ලියේ දේව මෙහෙයකට සහභාගී වී එහි නායකයින් හමුවීමට ද නියමිතයි.
පසුව යාපනයේ කොණ්ඩාවිල්හි ඉදිකෙරුනු ඇඟලුම් කර්මාන්ත ශාලාව විවෘත කිරීමට ද සැලසුම් කර ඇති අතර ඉදිරි දින කිහිපයේදී යාපනයේ විශේෂ හමුවිම් සහ සාකච්ඡා කිහිපයක් වෙනුවෙන් හිටපු ජනාධිපති මෛත්‍රීපාල සිරිසේන මහතා එක්වීමටයි නියමිතව ඇත්තේ.
