අම්බලන්ගොඩ, කන්ද මාවත ප්‍රදේශයේ දී ඊයේ (16) රාත්‍රියේ සිදුකළ වෙඩි තැබීමකින් හිටපු ක්‍රිකට් ක්‍රීඩකයෙක් ජීවිතක්ෂයට පත් වුණා.
මෙලෙස වෙඩි ප්‍රහාරයට ලක්ව ජීවිතක්ෂයට පත් වුණේ 2002 වයස අවුරුදු 19 පහළ ශ්‍රී ලංකා ලෝක කුසලාන කණ්ඩායමේ නායකයා ලෙස කටයුතු කළ ධම්මික නිරෝෂණ බවයි තොරතුරු වාර්තා වුණේ.
මොහු දැනට විදේශ ගතව සිටින පතාල කල්ලි සාමාජික සුරංග මානවඩු නැමැත්තාගේ ගෝලයෙක් බවයි පොලිසිය සඳහන් කළේ.
ධම්මික නිරෝෂණ නැමැත්තා නිවස ඉදිරිපිට රැඳී සිටි අවස්ථාවේ දී යතුරුපැදියකින් පැමිණි නාඳුනන පුද්ගලයින් දෙදෙනෙක් විසින් මෙම වෙඩි තැබීම සිදුකර පළාගොස් තිබෙනවා.
41 හැවිරිදි වියේ පසු වූ ධම්මික නිරෝෂණ දෙදරු පියෙක් වන අතර ඔහු මෑතකදී ඩුබායි සිට ශ්‍රී ලංකාවට පැමිණ සිටිය දී මෙම වෙඩි ප්‍රහාරයට ලක්ව ඇති බවයි තොරතුරු වාර්තා වුණේ.
පොලිසිය පවසන්නේ ඝතනයට ලක් වූ ධම්මික නිරෝෂණ අපරාධ සිද්ධීන් සම්බන්ධයෙන් මීට පෙර චෝදනා ලැබ සිටි අයෙක් නොවන බවයි.
ඝාතනයට ලක් වූ ධම්මික නිරෝෂණ මෘත ශරීරය පශ්චාත් මරණ පරීක්ෂණය සඳහා බලපිටිය රෝහල වෙත යොමුකර ඇති බවයි වාර්තා වුණේ.
මේ අතර පසුගිය කාලවකවානු තුළ අම්බලන්ගොඩ ප්‍රදේශයේ වෙඩි තැබීම කිහිපයක්ම වාර්තා වූ අතර, එලෙස වෙඩි ප්‍රහාරයට ලක්වූවන්ගෙන් අම්බලන්ගොඩ ප්‍රදේශයේ ස්ථිර පදිංචිකරුවෙක් ඉලක්ක කරගෙන මෑත කාලය තුළ එල්ල වූ වෙඩි ප්‍රහාරය මෙය බවයි පොලිසිය සඳහන් කළේ.
