තම මවට අමානුෂික අන්දමින් ඇයගේ පුත්‍රයා විසින් පහරදෙනු ලැබීමේ පුවතක් වාර්තා වනවා.
මෙම සිදුවීම වාර්තා වන්නේ අලුත්ගම – පාදාගොඩ – පිංහේන ප්‍රදේශයෙන්.
එම ප්‍රදේශයේ පිහිටි තම නිවසේ පදිංචි ව සිටි 72 හැවිරිදි වයෝවෘද්ධ කාන්තාවකට ඇයගේ වැඩිමහල් පුත්‍රයා විසින් ඊයේ රාත්‍රියේ දී පහර දී තර්ජනය කර ඇති බවයි පොලිස් හදිසි ඇමතුම් අංශයට තොරතුරු ලැබී ඇත්තේ.
ඒ අනුව ක්‍රියාත්මක වූ (119) හදිසි ඇමතුම් අංශය එම පැමිණිල්ල අලුත්ගම පොලිසිය වෙත දැන්වීමෙන් අනතුරුව වහාම ක්‍රියාත්මක වූ අලුත්ගම පොලිසිය සැකකාර පුත්‍රයා ව පොලිස් අත්අඩංගුවට ගෙන තිබෙනවා.
පහරකෑමට ලක් වූ වයෝවෘද්ධ මව මේ වනවිට රෝහල්ගත කර ඇති බවත්, ඇයගෙන් ප්‍රකාශයක් ලබාගෙන ඇති බවත් වාර්තා වනවා.
අප ප්‍රාදේශීය වාර්තාකරු පැවසුවේ මෙම සැකකරු මීට පෙර ද මෙම මවට පහර දී තර්ජනය කිරීමේ සිද්ධීන් රැසක් සම්බන්ධයෙන් පැමිණිලි ලද අයෙක් බවයි.
මෙම වයස්ගත කාන්තාවට කථනාබාධ සහිත බාල පුත්‍රයෙකු සිටින බවත්, ඔවුන් ජීවත් වන කුඩා නිවස සහිත ඉඩම් කැබැල්ලට දිගු කලක පටන් ඇති ආරවුලක් මුල් කරගනිමින් සැකකරු විසින් මවට පහර දී ඇති බවත් වාර්තා වනවා.
සැකකරු ව අද කළුතර අධිකරණයට ඉදිරිපත් කිරීමට නියමිතයි.
