පසුගියදා හැටන් – මල්ලිඅප්පුව ප්‍රදේශයේ දී අධික වේගයෙන් ධාවනය වූ පෞද්ගලික බස් රථයක් අසල ප්‍රපාතයට පෙරළීමේ සිදුවීමට සම්බන්ධව අත් අඩංගුවට ගෙන රක්ෂිත බන්ධනාගාරගත කර සිටි එම බස් රථයේ රියදුරු ජනවාරි මස 07 තෙක් තවදුරටත් රක්ෂිත බන්ධනාගාරගත කිරීමට නියෝග කෙරුණා.
මෙම නියෝගය අද (26) දින හැටන් මහේස්ත්‍රාත් අධිකරණය විසිනුයි සිදු කරනු ලැබුවේ.
හැටන් මහෙස්ත්‍රාත් එම්.ෆරුක්ඩින් මහතා නියෝග කළේ; අනතුර සම්බන්ධයෙන් නුවරඑළිය දිස්ත්‍රික් ප්‍රධාන මෝටර් රථ පරික්ෂකවරයා සහ හැටන් පොලිසිය විසින් සිදු කරන ලද විමර්ශන සම්බන්ධයෙන් වන වාර්තා අධිකරණයට ඉදිරිපත් කිරීමෙන් අනතුරුව කළ සලකා බැලීමෙන් පසුවයි.
මෙසේ රක්ෂිත බන්ධනාගාර ගත කරනු ලැබුවේ නාවලපිටිය නව තිස්පනේ පදිංචි රම්බොඩගෙදර ප්‍රසන්න බණ්ඩාර නමැති 46 හැවිරිදි තිදරු පියෙක්.
ඉකුත් (21) දින හැටන් සිට මහනුවර දක්වා සැකකරු විසින් ධාවනය කරන ලද පෞද්ගලික බස්
රථයක් හැටන් – කොළඹ ප්‍රධාන මාර්ගයේ මල්ලිඅප්පුව ප්‍රදේශයෙන් මාර්ගයෙන් ඉවතට පැන තේ වත්තට පෙරලීමෙන් අනතුරක් සිදුවුණා.
එම අනතුරින් බස් රථයේ ගමන් ගත් මගීන් තිදෙනකු ජීවිතක්ෂයට පත් වූ අතර තවත් 59 දෙනෙකු තුවාල ලබා රෝහල්ගත කෙරුණා.
රෝහල් ගත කළ තුවාලකරුවන්ගෙන් 15 දෙනෙකු වැඩිදුර ප්‍රතිකාර සඳහා මහනුවර ශික්ෂණ රෝහලේ සහ නාවලපිටිය දිස්ත්‍රික් මහ රෝහල වෙත මාරු කර යැවූ බවයි දසත ප්‍රාදේශීය වාර්තාකරු පැවසුවේ.
