හලාවත, සිංහපුර ප්රදේශයේ නිවසක හටගත් ගින්නකින් එකම පවුලේ තිදෙනෙක් මියයාමේ සිදුවීම; නිවස තුළ ඇති වූ ආරවුලක් මත සිදුවූවක් ද යන්න පිළිබඳ සැකයක් පවතින බව පොලිසිය පවසනවා.
පොලිස් මාධ්ය ප්රකාශක නියෝජ්ය පොලිස්පති නිහාල් තල්දූව පැවසුවේ නිවසේ ඉදිරිපස දොරටුව ඇතුළතින් අඟුලු දමා තිබූ බවට විමර්ශන නිලධාරීන්ට නිරීක්ෂණය වී ඇති බවත්, නිවසේ සාලය තුළ පොල් ලෙලි සහ දර පිටතින් රැගෙන ආ බවට සාක්ෂි දැකගැනීමට හැකි වූ බවයි.
හලාවත, සිංහපුර ප්රදේශයේ පිහිටි නිවසක ගින්නක් හටගෙන ඇති බවට අද (20) අලුයම් කාලයේ හලාවත පොලීසියට තොරතුරක් ලැබී තිබුණා.
එම තොරතුර මත එහි ගිය පොලිස් නිලධාරීන් ගිනි නිවීමේ භටයින් සමඟ එක්ව ගින්න නිවා දමා ඇති අතර, පසුව සිදුකළ සෝදිසි කිරීමේ දී පුදගලයින් තිදෙනෙකුගේ පිළිස්සුණු මළ සිරුරු සොයාගෙන තිබෙනවා.
මෙලෙස මියගොස් ඇත්තේ වයස අවුරුදු 51ක පුද්ගලයෙක්, ඔහුගේ බිරිඳ වන වයස අවුරුදු 44ක කාන්තාවක් සහ ඔවුන්ගේ 15 හැවිරිදි දියණිය බවයි පොලිසිය පැවසුවේ.
එහිදී කාන්තාවගේ මළ සිරුරු පහත මාලයේ නිදන කාමරයක තිබී සොයාගෙන ඇති අතර, ඇයගේ හිස සිරුරෙන් වෙන් වී තිබු බවයි පොලිසිය සඳහන් කළේ.
මෙම කාන්තාව හලාවත ප්රාදේශීය ලේකම් කාර්යාලයේ සංවර්ධන නිලධාරිනියක් ලෙස සේවය කර ඇති අතර, පිරිමි පුද්ගලයා ඉඩම් අලෙවි කිරීමේ ව්යාපාරයක නිරතව සිටි අයෙක් බවයි වාර්තා වන්නේ.
හලාවත ආනන්ද ජාතික පාසලේ ඉගෙනුම ලැබු දැරිය ලබන වසරේ සාමාන්ය පෙළ විභාගයට පෙනී සිටීමට නියමිතව සිට බව සඳහන්.
මහේස්ත්රාත් පරීක්ෂණය සිදුකිරීමෙන් අනතුරුව මළ සිරුරු හලාවත මූලික රෝහල වෙත පශ්චාත් මරණ පරීක්ෂණ සඳහන් අද (20) දහවල් රැගෙන ගොස් තිබෙනවා.
මේ අතර මීට මාසයකට පමණ පෙර මෙම නිවසේ තිබූ ලක්ෂ 25ක පමණ රන් ආභරණ අතුරුදහන් දී ඇති බවට ද තොරතුරු වාර්තා වනවා.
