හල්දුම්මුල්ල කැලිපාණාවල අස්වැද්දුම කන්දේ විශාල ප්‍රදේශයක් ඊයේ (9) පස්වරුවේ නායයෑමට ලක්වී තිබෙනවා.
මේ හේතුවෙන් එම ප්‍රදේශයේ පදිංචි පවුල් 35කට අයත් පුද්ගලයන් 141 දෙනෙකු ආරක්ෂිතව ඉවත් කරගැනීමට කටයුතු කළ බවයි හල්දුම්මුල්ල ප්‍රාදේශීය ලේකම් ඒ.කේ.ජේ. ප්‍රියංගිකා මහත්මිය සඳහන් කළේ.
නායයාමේ මූලික ලක්ෂණ පහළ වීමත් සමඟ පදිංචි ස්ථානවලින් එම පවුල් කඩිනමින් ඉවත් කර ගැනීමට කටයුතු කර ඇති අතර ඊයේ උදෑසන එම නිවාසවල තිබූ බඩු භාහිරාදිය ද ඔවුන් විසින් ඉවත් කරගෙන තිබුණා.
එලෙස ඉවත් වූ පවුල් ඥාති නිවෙස්වල මේ වනවිට රඳවා ඇති අතර ඔවුන් සඳහා අවශ්‍ය අහාර ඇතුළු අනෙකුත් පහසුකම් ලබාදීමට අවශ්‍ය කටයුතු කර ඇති බව හල්දුම්මුල්ල ආපදා සහන සේවා නිලධාරී වසන්ත උදයකුමාර මහතා සඳහන්කළා.
ජාතික ගොඩනැගිලි පර්යේෂණ සංවිධානය විසින් නායයෑමට ලක්වූ ප්‍රදේශයේ සිදු කළ භූමි පරීක්ෂාවකින් පසු එම ප්‍රදේශය අධි අවධානම් කලාපයක් ලෙස නම් කිරීමට පියවර ගෙන තිබෙනවා.
පැවැති අධික වර්ෂාවත් සමග මෙම නායයෑම සක්‍රිය වී ඇති අතර අක්කර තිහක පමණ භුමි ප්‍රදේශයක්, කුඹුරු යායක් ඇතුළුව නාය යාමට ලක්වී ඇතැයි සඳහන්. එමෙන්ම නිවාස 6ක් සම්පූර්ණයෙන් ම විනාශයට පත්ව ඇතැයි ප්‍රදේශවාසින් සඳහන් කළා.
ජාතික ගොඩනැගිලි පර්යේෂණ සංවිධානයේ ජ්‍යෙෂ්ඨ විද්‍යාඥ වසන්ත සේනාධීර මහතා සඳහන් කළේ පෙර දිනයේ අවදානම හේතුවෙන් ජනතාව ඉවත් කිරීම හමුවේ සිදුවීමට ගිය විනාශයක් වලක්වා ගැනීමට හැකිවූ බවයි.
තම සංවිධානයේ නිලධාරීන් එම ස්ථානය පරීක්ෂා කරමින් සිටින අතර ජනතාවට එහි යාමෙන් වලකින ලෙසටයි දැනුම් දෙන්නේ.
