කොවිඩ් වසංගත සමයේ මුහුණු ආවරණ (face mask) නිවැරදිව පැළඳ නොගැනීම නිසා රථයෙන් බැස යන ලෙස ඉල්ලා සිටි ප්රංශ බස් රථ රියදුරෙකුට පහර දී ඝාතනය කිරීමේ සිද්ධියකට චෝදනා එල්ලවූ පුද්ගලයින් දෙදෙනෙකුට සිර දඬුවම් නියම කර තිබෙනවා.
මනායි (Wyssem Manai) සහ ගයිනොන් (Maxime Guyennon) නම් සැකකරුවන් දෙදෙනා 2020 වසරේ දී නිරිතදිග ප්රංශයේ Bayonne නගරයේ දී රියදුරාගේ හිසට බරපතල තුවාල සිදු කර ඝාතනය කර ඇති බවටයි චෝදනා එල්ලවී ඇත්තේ.
මනායි සහ ගයිනොන්ට පිළිවෙළින් වසර 15 සහ 13 බැගින් සිර දඬුවම් නියම කර තිබෙනවා.
25 හැවිරිදි වියේ පසුවන මෙම දෙදෙනා ප්රචණ්ඩත්වයට වරදකරුවන් වූ අතර, ඝාතනය කිරීමේ චේතනාවකින් තොරව මෙම මරණයට සිදුවී ඇති බවටයි අධිකරණයේදී ප්රකාශ කෙරුණේ.
මොන්ගුයිලොට් නම් රියදුරා තම බස් රථයේ සිටි පිරිසකට ඔවුන්ගේ ටිකට් පෙන්වීමට සහ ඔවුන් නිකටේ පැළඳ සිටින මුහුණු ආවරණ සකස් කරන ලෙස ඉල්ලා සිටීමෙන් පසුව මෙම පහරදීම සිදු කර තිබෙනවා.
2020 වසරේ ජූලි 5 වන දින සවස ප්රහාරය සිදු වූයේ ප්රංශයේ පළමු කොවිඩ් අගුලු දැමීම අවසන් කර සියලුම පොදු ප්රවාහනය සඳහා මුහුණු ආවරණ අනිවාර්ය වීමෙන් පසුවයි.
බස් රථයේ ඇති වූ ගැටුමකදී සැකකරුවන් දෙදෙනා රියදුරාට පයින් පහර දී පහර දී ඇති අතර ඔහු වැටෙන විට හිස පදික වේදිකාවේ වැදී බරපතල තුවාල ල;ලබා තිබුණා.
59 හැවිරිදි තිදරු පියෙකු වූ ඔහු රෝහල් ගත කිරීමෙන් දින පහකට පසු මිය ගොස් තිබූ බවයි විදෙස් මාධ්ය වාර්තා කළේ.
දඬුවම් නියම වූ පුද්ගලයින් දෙදෙනාට වසර 15ක සිරදඬුවමක් ලබා දෙන ලෙසට එරට නීතිපතිවරයා ඉල්ලා තිබූ බව සඳහන්.
මියගිය පුද්ගලයාගේ බිරිඳ මෙම මරණය සම්බන්ධයෙන් දැඩි කනස්සල්ලට පත්ව සිටි අතර ඇය මෙම පුද්ගලයන්ට උපරිම වශයෙන් වසර 30ක සිර දඬුවමක් නොලැබීම පිළිබඳ කෝපයට පත්ව ඇති බවයි විදෙස් මාධ්ය වාර්තා කළේ.
මොන්ගුයිලොට් නම් මෙම රියදුරාගේ මරණය ප්රංශය කම්පනයට පත් කළ අතර ඔහුගේ බිරිඳ විසින් මෙහෙයවන ලද විරෝධතා පාගමනකට දහස් ගණනක් ජනයා සහභාගී වී සිටියා.
