පසුගිය සතිය තුළ හමාස් සහ ඉස්ලාමීය ජිහාඩ් කණ්ඩායම් සාමාජිකයින් 200 දෙනෙකු අත්අඩංගුවට ගෙන ප්‍රශ්න කිරීම සඳහා තම භූමියට රැගෙන ගිය බව ඊශ්‍රායලය පවසනවා.
ඇතැම් සැකකරුවන් සිවිල් ජනතාව අතර සැඟවී සිට ස්වේච්ඡාවෙන් භාර වූ බවයි ඊශ්‍රායලය නිවේදනයක් නිකුත් කරමින් කියා සිටියේ.
ඔවුන් පවසන්නේ හමාස් සටන්කාමීන් තුරන් කිරීමේ අරමුණින් ගාසා තීරය ආක්‍රමණය කර හමුදා මෙහෙයුම ආරම්භ කළ දා සිට පලස්තීන සටන්කාමීන් 700ක් අත්අඩංගුවට ගෙන ඇති බවයි.
කෙසේවෙතත් හමාස් සංවිධානය පවසන්නේ ඊශ්‍රායල ජාතිකයන් අතින් වැඩි වශයෙන් කාන්තාවන් සහ ළමුන් ඝාතනය වන බවයි.
ඊශ්‍රායලය මීට පෙර සිවිල් වැසියන්ට සිදුවන අනතුරු වළක්වා ගැනීමට පියවර ගන්නා බව අවධාරණය කර ඇති අතර, ජනාකීර්ණ ප්‍රදේශවලට පැමිණ ඇති බවට හමාස් සංවිධානයට චෝදනා කළා.
හමාස් සටන්කාමීන් ගාසා තීරයේ සිට දකුණු ඊශ්‍රායලය වෙත ඔක්තෝම්බර් 7 වැනි දින පැමිණ 1200ක් මරා දමා 240ක් පමණ ප්‍රාණ ඇපයට ගැනීමෙන් පසුවයි ඊශ්‍රායලය සිය ප්‍රතිප්‍රහාර මෙහෙයුම ආරම්භ කළේ.
හමාස් පාලනය කරන සෞඛ්‍ය අමාත්‍යාංශයට අනුව, එම සටන් ආරම්භයේ සිට ගාසා තීරයේ පුද්ගලයින් 20,000කට වැඩි පිරිසක් මිය ගොස් 53,000 ක් තුවාල ලබා තිබෙනවා.
සෙනසුරාදා නවතම තොරතුරුවලට අනුව සිකුරාදා දින පමණක් පුද්ගලයින් 201 දෙනෙකු මියගොස් තවත් 368 දෙනෙකු තුවාල ලබා ඇති බව සඳහන්.
ඊශ්‍රායලය නිවේදනය කළේ ගාසා තීරයේ සටන් වලදී තවත් තම සොල්දාදුවන් පස් දෙනෙකු මිය ගොස් ඇති අතර, ඒ අනුව තම ගොඩබිම් මෙහෙයුම ආරම්භ කළ දා සිට මියගිය මුළු සෙබළ සංඛ්‍යාව 144 දක්වා ඉහළ ගොස් ඇති බවයි.
