හමාස් සංවිධානය විසින් රඳවාගෙන සිටින ප්‍රාණ ඇපකරුවන් 14 දෙනෙකු අද දිනයේ නිදහස් කෙරෙන බව ඊශ්‍රායල බලධාරීන් පවසනවා.
කටාර් රාජ්‍යයේ මැදිහත්වීමෙන් ඇති වූ ගිවිසුමේ කොටසක් ලෙස ඊශ්‍රායලය ද පලස්තීන සිරකරුවන් 42 දෙනෙකු නිදහස් කරනු ඇති බවයි විදෙස් මාධ්‍ය වාර්තා කළේ.
අද ඊශ්‍රායලය සහ හමාස් සංවිධානය අතර ගැටුමේ දින හතරක සටන් විරාමයක දෙවන දිනයයි.
සිකුරාදා ප්‍රාණ ඇපකරුවන් 24 දෙනෙකු නිදහස් කරනු ලැබූ අතර ඔවුන්ට ඊශ්‍රායල ජාතිකයින් 13ක්, තායිලන්ත ජාතිකයින් 10ක් සහ එක් පිලිපීන ජාතිකයෙක් ඇතුළත් වුණා.
ගිවිසුමේ කොටසක් ලෙස පලස්තීන සිරකරුවන් 39 දෙනෙකු ඊශ්‍රායලය විසින් නිදහස් කරනු ලැබුවා.
යුද්ධය ආරම්භයෙන් පසු පැමිණි විශාලතම මානුෂීය රථ පෙළ සිකුරාදා ගාසා තීරයට ඇතුළු වූයේ ඉන්ධන, ආහාර සහ වෛද්‍ය සැපයුම් ද රැගෙනයි.
ඔක්තෝබර් 7 වැනිදා හමාස් ප්‍රහාරයෙන් පුද්ගලයන් 1200ක් මිය ගිය අතර 240ක් පමණ ප්‍රාණ ඇපයට ගෙන තිබෙනවා.
එතැන් පටන් ගාසා හි හමාස් පාලනය කරන සෞඛ්‍ය අමාත්‍යාංශය පවසන්නේ ඊශ්‍රායලයේ ප්‍රති ප්‍රහාර මාලාවෙන් පුද්ගලයින් 14,500 කට වැඩි පිරිසක් මිය ගොස් ඇති බවයි.
