ඊශ්‍රායලයේ රඳවාගෙන සිටින පලස්තීන සිරකරුවන් නිදහස් කිරීම වෙනුවෙන් හමාස් සංවිධානය විසින් ගාසා තීරයේ රඳවාගෙන සිටි තවත් ඊශ්‍රායල ප්‍රාණ ඇපකරුවන් තිදෙනෙක් අද දිනයේ නිදහස් කර තිබෙනවා.
එම ඊශ්‍රායල ප්‍රාණ ඇපකරුවන් තිදෙනා රතු කුරුස සංවිධානය වෙත මේ වනවිට භාර දී ඇති බවයි විදෙස් වාර්තා සඳහන් කළේ.
ප්‍රාණ ඇපකරුවන් තිදෙනා නිදහස්කර භාරදීම සම්බන්ධයෙන් වන ලේඛනවලට රතු කුරුස සංවිධාන නිලධාරීන් විසින් අත්සන් කර ඔවුන්ව භාර ගැනීමට කටයුතු කර තිබෙනවා.
එලි ෂරාබි, ඕහඩ් බෙන් ආමි සහ ඕර් ලෙවි යන ප්‍රාණ ඇපකරුවන් තිදෙනා මෙලෙස නිදහස් කර ඇති අතර, ඔවුන්ව දැකබලා ගැනීමට ඊශ්‍රායල ජාතිකයින් ටෙල් අවිව් හි ප්‍රාණ ඇපකරුවන්ගේ චතුරශ්‍රයේ රැස්ව සිටින බවයි වාර්තා වන්නේ.
ජනවාරි 19 වන දින ආරම්භ වූ ඊශ්‍රායලය සහ හමාස් අතර සටන් විරාම ගිවිසුම යටතේ පලස්තීන සිරකරුවන් 180ක් ඊශ්‍රායල බන්ධනාගාරවලින් නිදහස් කරනු ලැබුවා.
ගිවිසුමේ පළමු අදියරේ දී ඊශ්‍රායල ප්‍රාණ ඇපකරුවන් 33 දෙනෙකු හමාස් සංවිධානය විසින් නිදහස් කිරීමට නියමිත බවයි වාර්තා වුණේ.
