සෞඛ්ය අමාත්යාංශය විසින් සිදුකරනු ලබන හදිසි ඖෂධ මිලදී ගැනීමේ ක්රියාවලිය අත්හිටුවීමේ නියෝගයක් නිකුත් කරන ලෙස ඉල්ලා වෛද්ය හා සිවිල් අයිතිවාසිකම් පිළිබඳ සංවිධානයේ සභාපති විශේෂඥ වෛද්ය චමල් සංජීව විසින් අගවිනිසුරුවරයා වෙත ලිඛිත ඉල්ලීමක් ඉදිරිපත් කර තිබෙනවා.
ඒ, අනුව මෙම ඉල්ලීම ඇතුළත් ලිපියක් වෛද්ය චමල් සංජීව විසින් අද (19) පෙරවරුවේ අගවිනිසුරු ජයන්ත ජයසූරිය වෙත ඉදිරිපත් කිරීම සඳහා ශ්රේෂ්ඨාධිකරණයේ රෙජිස්ට්රාර්වරයා වෙත භාර දෙනු ලැබුවා.
අගවිනිසුරුවරයා වෙත යොමු කර ඇති එම ලිපිය මඟින් එම සංවිධානය කියා සිටින්නේ සෞඛ්ය අමාත්යාංශය මෑතක සිට හදිසි මිලදීගැනීම් බව සඳහන් කරමින් විශාල වශයෙන් ඖෂධ මිලදී ගැනීමේ ක්රියාවලියක් ආරම්භ කර ඇති බවයි.
මෙම හදිසි මිලදී ගැනීම්වල දී ඖෂධවල ප්රමිතිය පිළිබඳව බරපතළ ගැටලු මතු වී තිබෙන බවත් ඒවා මිලදී ගැනීමේ දී ප්රසම්පාදන ක්රියාවලිය අනුගමනය කිරීමක් සිදුනොවන බවත් එම සංවිධානය චෝදනා කර සිටියා.
මේ හේතුවෙන් මහජන මුදල් විශාල වශයෙන් අවභාවිතාව ලක් කෙරෙන බවත් ප්රමිතියෙන් තොර ඖෂධ පරිහරණය කිරීම තුළින් රෝගීන්ගේ මරණ මෙන්ම සංකූලතාවයන් වාර්තා වී ඇති බවත් එම සංවිධානය පවසනවා.
ආණ්ඩුක්රම ව්යවස්ථාවේ 28 වන වගන්තිය යටතේ මහජන අයිතිවාසිකම් ආරක්ෂා කිරීමට රජය බැඳී සිටින බවත් ඒ අනුව මෙම ඉල්ලීම පදනම් කරගෙන නඩු කටයුත්තක් ආරම්භ කොට සෞඛ්ය අමාත්යාංශය මඟින් සිදුකරනු ලබන හදිසි ඖෂධ මිලදී ගැනීම් කටයුතු අත්හිටුවීමේ නියෝගයක් නිකුත් කරන ලෙසත් එම සංවිධානය විසින් අගවිනිසුරුවරයා වෙත භාරදුන් ලිඛිත ඉල්ලීමේ අයැද තිබෙනවා.
