අධික වේගයෙන් ධාවනය වූ මෝටර් රථයක් වේග පාලනය කරගැනීමට නොහැකිව නිවසකට කඩා වැදීමෙන් සිදු වූ අනතුරකින් හත් හැවිරිදි දැරියක් ඊයේ (23) අවාසනාවන්ත ලෙස ජීවිතක්ෂයට පත් වුණා.
නිවස ඉදිරිපිට මිදුලේ පාපැදියක් පදිමින් සිටි දැරියක් මෙලෙස ජීවිතක්ෂයට පත්ව ඇති අතර මොරගහහේන,පොල්වත්ත ප්‍රදේශයේ දී මෙම අනතුර සිදුව තිබෙනවා.
අධික වේගයෙන් පැමිණි මෝටර් රථය රියදුරුට පාලනය කරගත නොහැකිව දැරිය පදිංචි නිවසේ ගේට්ටුව ද කඩාගෙන මිදුලට කඩා වැදී මෙම අනතුර වී ඇතැයි පොලිසිය පවසනවා.
මෝටර් රථය මිදුලට කඩා වැදීමත් සමඟම දැරිය පදිමින් සිටි පාපැදියේ ගැටී එයත් සමඟ ඉදිරියට ඇදී ගොස් මෝටර් රථය නැවතී ඇතැයි පොලිසිය වැඩි දුරටත් සඳහන් කළා.
අනතුරින් බරපතළ තුවාල ලැබූ දැරිය හොරණ මූලික රෝහලට ඇතුළත් කරන විටත් මිය ගොස් සිටි බවයි වාර්තා වුණේ.
