දේශීය ණය ප්‍රතිව්‍යුහගත කිරීමේ වැඩපිළිවෙළ යටතේ සේවක අර්ථසාධක අරමුදලේ මුදල් භාණ්ඩාගාර බිල්පත්වල සහ බැඳුම්කරවල ආයෝජනය කිරීමේ දී ගෙවනු ලබන පොලී අනුපාතය 9% දක්වා අඩු කිරීමට පසුගිය රජය ගෙන තිබූ තීරණය අභියෝගයට ලක් කරමින් ගොනුකර තිබූ පෙත්සම් 04ක් විභාගයට ගැනීමට අවසර දීමකින් තොරවම ශ්‍රේෂ්ඨාධිකරණය ප්‍රතික්ෂේප කර තිබෙනවා.
දසත අධිකරණ වාර්තාකරු පැවසුවේ; ප්‍රීති පද්මන් සූරසේන, අචල වෙන්ගප්පුලි, කුමුදුනි වික්‍රමසිංහ යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල ඉදිරියේ එම පෙත්සම් අද (30) කැඳවනු ලැබූ බවයි.
එහිදී වගඋත්තරකරුවන් වෙනුවෙන් පෙනී සිටි අතිරේක සොලිසිටර් ජෙනරාල් විරාජ් දයාරත්න මහතා, ජනාධිපති නිතිඥ එරාජ් ද සිල්වා ඇතුලු නීතිඥ මණ්ඩලයක් ඉදිරිපත් කළ මුලික විරෝධතා පිළිගත් විනිසුරු මඩුල්ල නියෝග කළේ පෙත්සම් නිෂ්ප්‍රභ කිරීමටයි.
කටුනායක නිදහස් වෙළෙඳ කලාපයේ සේවක සංගමය ඇතුළු පාර්ශ්ව හතරක් එම පෙත්සම් ගොනු කර තිබුණා.
