එප්පාවල පොස්පේට් සමාගමේ සේවකයෙකුගේ පහරකෑමට ලක් වූ එහි සැපයුම් නිලධාරියාගේ වැඩ තහනම් කර තිබෙනවා.
පහර දුන් සේවකයාට කිසිදු විනය ක්‍රියාමාර්ගයක් ගෙන නොමැති බවයි පහර කෑමට ලක් වූ නිලධාරියා පවසන්නේ.
රාජ්‍ය අමාත්‍ය චාමර සම්පත් දසනායක මහතා පසුගිය 17 වනදා එප්පාවල පොස්පේට් සමාගමේ නිරීක්ෂණ චාරිකාවක නිරත වුණා. එහිදී එම ආයතනයේ සේවකයෙකු සැපයුම් නිලධාරී එස්.ඒ අබේසිරි මහතාට චෝදනා කරමින් පහරදී තිබුණා.
ඒ ඇඹරුම් යන්ත්‍රයක් සදහා අමතර කොටසක් ගෙන්වීමේ දී අදාළ නොවන වර්ගයේ කොටසක් ගෙන් වූ බවට චෝදනා කරමින්.
එය ගෙන්වා මාස කිහිපයක් ගතවී ඇතත් තවමත් මාරු කර අවශ්‍ය අමතර කොටස ගෙන්වා නැති බවටයි සැපයුම් නිලධාරියාට චෝදනා එල්ල වූයේ.
එහිදී අදාළ ගැටුම සිදුවී තිබුණා.
මෙහිදී සේවකයෙකුගේ පහරකෑමට ලක් වූ සැපයුම් නිලධාරියා ඒ සම්බන්ධයෙන් එප්පාවල පොලිසියට පැමිණිලි කර තිබෙනවා.
එය අද දිනයේදී විභාගයට ගැනීමෙන් අනතුරුව පැමිණිල්ල සමත මණ්ඩලයට යොමු කිරීමට පොලිසිය කටයුතු කර ඇති බවයි සැපයුම් නිලධාරී එස්.ඒ අබේසිරි මහතා පවසන්නේ.
ඊට තම විරෝධය පළ කරන අතර අධිකරණමය ක්‍රියාමාර්ග ගන්නා බව ඔහු සඳහන් කළා.
