වෙනත් පුද්ගලයින්ට අයත් ජාතික හැඳුනුම්පත් 09ක් සහ ගුවන් ගමන් බලපත්‍ර 02ක් ළඟ තබා ගැනීමේ චෝදනා මත හෝටල් හිමිකරුවෙකු පොලිස් අත්අඩංගුවට ගෙන තිබෙනවා.
තම හෝටලයේ සේවය සඳහා පැමිණෙන සේවකයන්ට අයත්, ජාතික හැඳුනුම්පත හෝ ගුවන් ගමන් බලපත්‍රය සැකකරු
විසින් සිය භාරයට ගෙන ඇති අතර සේවකයා එම හෝටල් සේවයෙන් ඉවත්ව යන්නේ නම් සැකකරුට රුපියල් 7000ක මුදලක් ලබාදී හැදුනුම්පත හෝ ගුවන් ගමන් බලපත්‍රය ලබාගත යුතුව තිබී ඇති බවටයි හෙළිවී ඇත්තේ.
සැකකරුට අයත් හෝටලයේ සේවය කර ඉවත්ව යන සේවකයෙකු, ඔහුට අයත් ජාතික හැඳුනුම්පත ඉල්ලා සිටි අවස්ථාවේ සැකකාර හෝටල් හිමියා පැමිණිලිකාර සේවකයාගෙන් ද රුපියල් 7000ක මුදලක් ඉල්ලා තිබෙනවා.
එම මුදල ලබා දීමට අකමැත්ත ප්‍රකාශ කළ හෝටල් සේවකයා, තම ජාතික හැදුනුම්පත සේවය කළ හෝටලයේ හිමිකරු බලහත්කාරෙන් රඳවා තබාගෙන සිටින බවට යක්කල පොලිසියට කළ පැමිණිල්ලක් අනුවයි පරීක්ෂණ ආරම්භ වී ඇත්තේ.
එම විමර්ශනයේදී හැඳුනුම්පත් නවයක් සහ ගුවන් ගමන් බලපත්‍ර දෙකක් සමඟ අදාළ සැකකරු අත්අඩංගුවට ගනු ලැබුවා.
සැකකරු ගම්පහ මහේස්ත්‍රාත් අධිකරණයට ඉදිරිපත් කිරීමට නියමිතයි.
