ගනේමුල්ල සංජීව නමැති ප්රබල අපරාධ කල්ලි නායකයාගේ ඝාතනයට පොලිසිය විසින් අත්අඩංගුවට ගැනීමට තවමත් සොයමින් සිටින අතුරුදන් කටුවැල්ලේගම ඉෂාර සෙව්වන්දි නමැති සැකකාරිණියගේ මවගේ අවසන් කටයුතු අද (15) සිදු කිරීමට නියමිතයි.
අලුත්කඩේ අධිකරණ සංකීර්ණයේ දී ගනේමුල්ල සංජීවට වෙඩි තැබීමේ සිද්ධියට ආධාර අනුබල දීමේ චෝදනාවට පසුගියදා සෙව්වන්දි නමැත්තියගේ මව හා සොහොයුරා ව පොලිසිය විසින් අත් අඩංගුවට ගනු ලැබුවා.
ඔවුන් අධිකරණයට ඉදිරිපත් කිරීමෙන් අනතුරු රක්ෂිත බන්ධනාගාරගත කිරීමටයි නියෝග කෙරුණේ.
කෙසේවෙතත් ජූලි 11 වැනිදා සැකකාර සෙව්වන්දිගේ මව හෘදයාබාධයක් හේතුවෙන් ජීවිතක්ෂයට පත් වූයේ සිරමැදිරියේදීමයි.
ඊයේ (14) දහවල් වන විට මියගිය සැකකාරිණියගේ දේහය ඇයගේ කටුවැල්ලේගම ප්රදේශයේ නිවසේ තැන්පත් කර තිබෙනවා.
ඊයේ දිනයේත් සහ අද දිනයේත් දේහය තැන්පත් කර ඇති නිවසට සහ ඒ අවට ප්රදේශවලට දැඩි පොලිස් ආරක්ෂාවක් සහ බුද්ධි අංශ ආරක්ෂාවක් යොදා ඇති බව ද වාර්තා වනවා.
