ප්‍රේමය ප්‍රතික්ෂේප කර මරු වැළඳගත් ටික්ටොක් සුරූපිනිය

පාකිස්තාන සමාජ මාධ්‍ය ක්‍රියාකාරිනියක වූ 17 හැවිරිදි සානා යූසුෆ් ඉස්ලාමාබාද්හි ඇගේ නිවස තුළ දී වෙඩිතබා ඝාතනය කර තිබෙනවා.

සානාගේ ආදරය ඉල්ලා තරුණයෙකු විසින් කළ යෝජනාව ඇය ප්‍රතික්ෂේප කිරීම හේතුවෙන්, ඊට පළිගැනීමක් ලෙස මෙම වෙඩිතැබීම සිදුකර ඇති බව යි එරට මාධ්‍ය වාර්තා කරන්නේ.

සානා මෙම අවාසනාවන්ත සිදුවීමට මුහුණපා ඇත්තේ ජුනි 02 වැනි දිනයේදී වන අතර, වෙඩි ප්‍රහාරය එල්ල වන විට ඇගේ මව ද ඒ ආසන්නයේ සිට තිබෙනවා.

ඇගේ 17 වන උපන්දිනය යෙදී තිබුණේ ද ඉකුතු මැයි 29 වනදාය.

ඝාතනයට සැකපිට 22 හැවිරිදි උමර් හයාත් නම් තරුණයෙකු පාකිස්තාන පොලීසිය විසින් මේ වනවිට අත්අඩංගුවට ගෙන තිබෙනවා.

ඔහු ඉස්ලාමාබාද් අගනුවරට කිලෝමීටර් 320ක් පමණ දුරින් පිහිටි ෆයිසලාබාද්හි පදිංචිකරුවෙක්.

සැකකාර ඝාතකයා කලක සිට සානාගේ ආදරය ලබාගැනීමට උත්සාහ කළ පුද්ගලයෙකු බව සඳහන්.

කෙසේ නමුත් ඒ සෑම අවස්ථාවකදීම ඇය ඔහුගේ ආදර යෝජනා ප්‍රතික්ෂේප කර තිබෙනවා.

සානා ඝාතනයට ලක් වූ දින ද ඔහු, සානා හමුවීමට පැය කිහිපයක් උත්සාහ කළත් එය අසාර්ථක වී නැහැ.

ඒ හේතුවෙන් ඔහු බලහත්කාරයෙන්ම සානාගේ නිවසට ඇතුළු වී මෙම වෙඩිතැබීම සිදු කර තිබෙනවා.

සානාගේ මව විසින් ලබා දී ඇති ප්‍රකාශය අනුව වෙඩික්කරු පිස්තෝල ගිනිඅවියකින් සානා ආසන්නයටම පැමිණ මෙම වෙඩිතැබීම සිදුකර තිබෙනවා.

ඇගේ සිරුරේ වෙඩි උණ්ඩ දෙකක් තිබී සොයාගෙන ඇති බවයි වාර්තා වන්නේ.

සානාගේ ටික්ටොක් ගිණුමේ මිලියන 1.3කට වැඩි අනුග්‍රාමිකයන් පිරිසක් සිටින අතර, ඇගේ ඉන්ස්ටග්‍රෑම් ගිණුමේ ද ලක්ෂ 7කට ආසන්න අනුගාමිකයින් සිටිනවා.