රුසියාව සමඟ පවතින යුද්ධය අවසන් කිරීමට “සුදු කොඩිය එසවීමට ධෛර්යය ඇති කර ගන්නා ලෙස” ඇති උතුම් ෆ්රැන්සිස් පාප් වහන්සේ කළ ඉල්ලීම යුක්‍රේනය තරයේ ප්‍රතික්ෂේප කර තිබෙනවා.
“අපගේ ධජය කහ සහ නිල් එකක්. අපි ජීවත් වන, මැරෙන සහ පවතින ධජය මෙයයි. අපි කිසි විටෙකත් වෙනත් කොඩි ඔසවන්නේ නැත යනුවෙන් යුක්‍රේනය විදේශ අමාත්‍ය ඩිමිට්‍රෝ කුලේබා ඊයේ සමාජ මාධ්‍ය ඔස්සේ ප්‍රකාශ කළා.
කෙසේ වෙතත් වතිකානු ප්‍රකාශකයෙක් පැවසුවේ පාප් වහන්සේ කතා කරන්නේ යටත් වීම නොව සාකච්ඡා මාර්ගයෙන් සටන් නැවැත්වීම ගැන බවයි.
මේ අතර පාප් වහන්සේගේ මෙම ප්‍රකාශයත් සමඟ පෝලන්ත විදේශ අමාත්‍යවරයා විමසා සිටියේ සමබරතාවය සඳහා පාප් වහන්සේ රුසියානු ජනාධිපති ව්ලැඩිමීර් පුටින්ට යුක්‍රේනයෙන් රුසියානු හමුදා ඉවත්කර ගැනීමට දිරිගන්වන්නේ ද යන්නයි.
පාප් වහන්සේ සිදුකළ මෙම ඉල්ලීමත් සමඟ යුක්‍රේන ග්‍රීක කතෝලික පල්ලියේ ප්‍රධානියා ඇතුළු පිරිසට සමාජ මාධ්‍ය ඔස්සේ මේ වනවිට යුක්‍රේනියානුවන්ගෙන් ද දැඩි විවේචන එල්ල වී තිබෙනවා.
වසර දෙකකට ආසන්න කාලයක සිට උද්ගතව රුසියානු – යුක්‍රේනය යුද්ධයෙන් යුක්‍රේනයට සැලකිය යුතු හානියක් මේ වනවිට සිදුව තිබෙනවා.
