සුද්දට ක්‍රිකට් අමතක කළ ශ්‍රී ලංකා පන්දු බලඇණිය

එක්දින ක්‍රිකට් ලෝක කුසලානය යටතේ පැවැත්වෙන 25 වැනි තරගයට පළමු ව පිතිකරණයෙන් එක් වූ එංගලන්ත කණ්ඩායමෙන් ශ්‍රී ලංකා කණ්ඩායමට ලකුණු 157ක ඉලක්කයක් හිමි වුණා.

තරගය අද පස්වරු 02ට ආරම්භ වූයේ බැංග්ලෝර් හි දීයි.

කාසියේ වාසිය දිනාගත් එංගලන්ත නායක ජොස් බට්ලර් පළමු ව පන්දුවට පහරදීමට තීරණය කළා.

ප්‍රතිවාදී ශ්‍රී ලංකාවට එරෙහි ව දැවැන්ත ලකුණු පුවරුවක් නිර්මාණය කිරීමට යැයි සිතා පිටියට ආ එංගලන්ත ඉනිමෙහි මුල් කඩුලු 05 ලකුණු 100ක් තුළ දවාගන්නටයි ශ්‍රී ලංකා කණ්ඩායම සමත් වුණේ.

බෙන් ස්ටොක්ස් හැර වෙනත් ප්‍රබල කිසිදු එංගලන්ත පිතිකරුවෙකුට අද දින එතරම් සුබ වුණේ නම් නැහැ.

ආරම්භක පිතිකරු ජොනී බෙයාර්ස්ටෝ ලකුණු 30ක් ද ඩේවිඩ් මලාන් ලකුණු 28ක් ද රැස් කළා.

ඉන් අනතුරුව යම් තාක් දුරකට හෝ ස්ටොක්ස්ට හයියක් වීමට හැකි වූයේ මොඑන් අලීට පමණි.

අලී ලකුණු 15කට දැවී ගියා.

ඒ අනුව එංගලන්ත ලකුණු පුවරුව මහත් අසීරුවෙන් ඉහළට ඔසවා තැබීමට ස්ටොක්ස් පන්දු 72කට ලබාගත් ලකුණු 43ට යම් තාක් දුරකට හැකි වුණා.

ස්ටොක්ස් ව ඔහුගෙ අර්ධ ශතකය පෙනෙන මානයේ සිටියේ දවා ගැනීමට සමත් වූයේ ළහිරු කුමාර විසින්.

කඩුලු බිඳ හෙලීමේ දී මෙවර එක්දින ලෝක කුසලාන සංචිතයටවත් එක් කර නොතිබූ ඇන්ජිලෝ මැතිව්ස් විශේෂ දායකත්වයක් ලබා දුන්නා.

ප්‍රබල මෙන් ම මුල් පෙළ පිතිකරුවෙකු වන ඩේවිඩ් මලාන් ව සහ අලීගේ කඩුලු ද්විත්වය ම හිමිකරගත්තේ මැතිව්ස් විසින්.

අද තරගයේ වැඩිම කඩුලුලාභියා වූයේ ළහිරු කුමාර යි.

කසුන් රාජිතට කඩුලු 02ක් සහ මහීෂ් තීක්ෂණට එක් කඩුල්ල බැගින් හිමිවුණා.

අද තරගය ජය ගැනීම අතිශය තීරණාත්මක වනු ඇති.

ඒ මේ වනවිට අද තරගයත් සමග තරග 05කට එක්ව ඇති ශ්‍රී ලංකාව තරග 04ක් ක්‍රීඩා කර, එක් තරගයක් පමණක් ජයග්‍රහණය කර තිබීමයි.

ඔවුන් ප්‍රසාද ලකුණු සටහනේ 07 වැනි ස්ථානයේ රැඳී සිටිනවා.

එංගලන්තය තරග 05කට ක්‍රීඩා කර ඉන් තරග එකක් පමණක් ජයග්‍රහණය කර 8 වැනි ස්ථානයේ පසුවනවා.

එබැවින් මෙම තරගය ජය ගැනීම දෙපිළට ම තීරණාත්මක වනු ඇති.

පන්දුවාර 50 අවසන් වීමට පෙර පන්දුවාර 33ක් නිමා වීමටත් පෙර එංගලන්ත ඉනිම අවසන් වීම ද විශේෂත්වයක්.

ඒ අනුව ශ්‍රී ලංකා කණ්ඩායමට අද තරගය එංගලන්තය පරදවා ජය ගැනීමට නම්; පන්දු 300ක දී කඩුලු 10ක් තුළ ලකුණු 157ක් ලබාගත යුතු වනවා.