සිංහල ප්‍රශස්ති හා හටන් කාව්‍ය යටතේ මධ්‍යම සංස්කෘතික අරමුදල මගින් ප්‍රකාශයට පත් කළ ‘සීතාවක හටන’ කෘතිය අග්‍රාමාත්‍ය දිනේෂ් ගුණවර්ධන වෙත පිළිගන්වා තිබෙනවා.
මධ්‍යම සංස්කෘතික අරමුදලේ අධ්‍යක්ෂ ජෙනරාල් මහාචාර්ය ගාමිණී රණසිංහ විසින් අගමැති කාර්යාලයේදී මෙම කෘතිය ඊයේ දිනයේ දී පිළිගන්වනු ලැබූ බවයි වාර්තා වන්නේ.
මෙම අවස්ථාවට බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක සහ පාර්ලිමේන්තු මන්ත්‍රී යදාමිණි ගුණවර්ධන, බුද්ධ ශාසන, ආගමික හා සංස්කෘතික අමාත්‍යංශයේ ලේකම් සෝමරත්න විදානපතිරණ, අතිරේක ලේකම් කේ.ඒ.ඩි.ආර්. නිශාන්ති ජයසිංහ, අග්‍රාමාත්‍ය පෞද්ගලික ලේකම් සී කුරුප්පු යන යන පිරිස් සහභාගී වුණා.
මෙහිදී අමාත්‍යාංශ ලේකම්වරයා විසින් පාර්ලිමේන්තු මන්ත්‍රී යදාමිණී ගුණවර්ධන වෙත ද කෘතිය පිළිගන්වනු ලැබුවා.
‘සීතාවක හටන’ සම්මානිත මහාචාර්ය රෝහිණි පරණවිතාන විසින් සංස්කරණය කර ඇති අතර සීතාවක යුගයේදී ම(1507දී) එය රචනා කර ඇත්තේ, අත්තන්හරි අබය අලහප්පෙරුම විජයවර්ධන කවියා ය.
මෙම රචනය සංස්කරණය කර මධ්‍යම සංස්කෘතික අරමුදල විසින් මුද්‍රණයෙන් ප්‍රකාශයට පත්කරන්නේ, පළමු වතාවටය.
සීතාවක යුගයේ සජීවී ව සටන්වලට දායක වූ අයෙකු ලෙස සැලකෙන අලහප්පෙරුම කවියාගේ මෙම හටන් කාව්‍ය, පැරණි ම සිංහල හටන් කාව්‍ය ලෙස ද විද්‍යාර්ථීන්ගේ ආශ්‍රයට යොමු විය යුතු කෘතියක්.
අනෙක් පැත්තෙන්, සීතාවක මායාදුන්නේ සහ පළමුවන රාජසිංහ රජවරු මෙහෙය වූ යුද්ධ පිළිබඳ රචනා වූ මෙම කෘතිය ඒ යුගයේ දේශපාලන තත්ත්වය, පොදු ජනතාවගේ සිතිවිලි, ඔවුන්ගේ බස් වහර ගැන හෙළි කරන්නක් ලෙසට ද වාර්තා වනවා.
