සිරියාවේ ඩමස්කස් අගනුවර බලය අල්ලා ගැනීමට හැකි වූ බව සිරියාවේ විපක්ෂ කැරළිකරුවන් පවසනවා.
මේ වන විටත් ජනාධිපති බෂාර් අල්-අසාද් රටින් පලා ගොස් ඇති බවයි තොරතුරු වාර්තා වන්නේ.
කෙසේ වෙතත් ඔහු පළාගියේ කොහෙටද යන්න තවමත් අනාවරණය වී නැහැ.
හයාත් ටරිර් අල්-ෂාම් හි අණදෙන නිලධාරී අබු මොහොමඩ් අල්-ජුලානි පවසන්නේ, සියලුම රාජ්‍ය ආයතන නිල වශයෙන් භාරදෙන තුරු අල්-අසාද්ගේ අගමැතිවරයාගේ අධීක්ෂණය යටතේ ඒවා පවතිනු ඇති බවයි.
මේ අතර අල්-අසාද්ගේ ආණ්ඩුව බිඳ දැමීම පිළිබඳව සිරියාවේ දස දහස් සංඛ්‍යාත ජනතාව මහා මාර්ගවලට රැස් වී ප්‍රීතිවන අයුරු දැකගත හැකි බවයි විදෙස් මාධ්‍ය පැවසුවේ.
කැරළිකරුවන් ඩමස්කස් අගනුවර බලය අල්ලා ගැනීමෙන් පසු, පළිගැනීම්වලින් තොර “නව යුගයක්” ප්‍රකාශ කර ඇති අතර, එතෙර සිටින සිරියානුවන්ට ආපසු මව්බිමට පැමිණෙන ලෙස ආරාධනා කර තිබෙනවා.
