මෙරට පොලිස් අත්අඩංගුවේ සිටියදී සහ බන්ධනාගාර භාරයේ සිටියදී සිදුවන පුද්ගල ඝාතන සම්බන්ධයෙන් සැකසූ විශේෂ වාර්තාවක්, සිරකරු අයිතිවාසිකම් කමිටුව විසින් ජිනීවා හි එක්සත් ජාතීන්ගේ මානව හිමිකම් කවුන්සිලයට භාර දී තිබෙනවා.
මෙම වාර්තාව ශ්රී ලංකා මානව හිමිකම් කොමිෂන් සභාවට ද භාර දුන් බවයි සිරකරු අයිතිවාසිකම් කමිටුව සදහන් කළේ.
ශ්රී ලංකාවේ පොලිස් භාරයේ සිටියදී සහ බන්ධනාගාර භාරයේ සිටියදී සිදුවන සැකකරුවන් ඝාතනය පසුගිය වසර කිහිපයේදී සැලකිය යුතු මට්ටමකින් ඉහළ ගොස් ඇති බව සිරකරු අයිතිවාසිකම් කමිටුව සිය වාර්තාව මගින් පෙන්වා දෙනවා.
2020 වසරේ ජනවාරි මාසයේ සිට 2023 වසරේ අගෝස්තු මාසය දක්වා කාලය තුළ මානව හිමිකම් කවුන්සිලයටද වාර්තා වී ඇති එවැනි මරණ 24ක් සහ පොලිසිය සම්බන්ධ ගැටුම් මරණ 13ක් පිළිබඳ තොරතුරු අදාළ වාර්තාව මගින් අනාවරණය කරනවා.
2023 වසරේ ජනවාරි 10 වැනි දින පොලිස් මත්ද්රව්ය නාශක කාර්යාංශය විසින් අත්අඩංගුවට ගෙන සිටියදී මියගිය ඒ.ජී.එස්. ප්රීති කුමාර මහතාගේ මරණය සහ තම හාම්පුතාට අයත් රන් ආභරණ සොරකම් කිරීමේ චෝදනාවට අත්අඩංගුවට ගෙන සිටියදී මියගිය ආර්. රාජ්කුමාරිගේ මරණ සම්බන්ධයෙන් දීර්ඝ විවරණයක් මෙම වාර්තාව මගින් සපයා තිබෙනවා.
ඔවුන්ගේ මරණ සම්බන්ධයෙන් පොලීසිය ගෙනහැර පෑ කරුණු සහ මරණ පරීක්ෂණවලදී මෙන්ම අධිකරණයේදී තහවුරු වූ කරුණු අතර පරස්පරතා ගෙනහැර දක්වන අදාළ වාර්තාව, මෙවැනි මරණ වළක්වා ගැනීම සඳහා ප්රමාණවත් මැදිහත්වීමක් කරන ලෙස එක්සත් ජාතීන්ගේ මානව හිමිකම් කවුන්සිලයෙන් ඉල්ලා සිටිනවා.
ඒ සඳහා නිර්දේශ මාලාවක් මෙරට නීතිය ක්රියාත්මක කරන ආයතන වෙත් ඉදිරිපත් කරන ලෙසත් සිරකරු අයිතිවාසිකම් කමිටුව ඉල්ලා තිබෙනවා.
