සිංහල සිනමාවේ සිහින කුමාරයාගේ කොලිවුඩ් සම්ප්‍රාප්තිය

හේමාල් රණසිංහගේ ඉන්දියානු සිනමා ආගමනය සටහන් කළ ‘සෙකන්ඩ් ෂෝ’ (Second Show) නම් වූ කොලිවුඩ් සිනමාපටයේ පසු නිෂ්පාදන කටයුතු අවසන්ව එය ප්‍රදර්ශනය කිරීම වෙනුවෙන් මූලික කටයුතු මේ වනවිට සැකසෙමින් පවතියි.

ඉන්දීය දමිළ ජාතික A.T. Gnanam විසින් කුලුඳුලේ අධ්‍යක්ෂණය කළ ‘සෙකන්ඩ් ෂෝ’ චිත්‍රපටයේ ප්‍රධාන චරිතවලට හේමාල් රණසිංහ, ජනප්‍රිය මරාති නිළි පල්ලවී සුභාෂ් (යශෝධරා සිංහල චිත්‍රපටයේ ප්‍රධාන චරිතය) සහ කොලිවුඩ් ෆිල්ම් ෆෙයාර් සම්මානලාභි නළු අජ්මල් අමීර් පණ පොවති. 2019 වර්ෂයේ නොවැම්බර් හා දෙසැම්බර් මාසවලදී මුළුමනින්ම එංගලන්තයේදී (ලන්ඩන් හා බර්මිවල) රූපගත කළ මෙම චිත්‍රපටය එකම දර්ශන තලයේ දමිළ සහ සිංහල යන භාෂා විත්වයෙන්ම රූපගත කොට තිබීම විශේෂත්වයකි. (මෙහි සිංහල දෙබස් රචනය සිනමා අධ්‍යක්ෂ තිසර ඉඹුලානගෙනි.)

‘සෙකන්ඩ් ෂෝ’ චිත්‍රපටය හේමාල්ගේ රංගනය ඇතුළත් පළමු විදෙස් චිත්‍රපටය වන අතර එය හේමාල් සිය සිනමා ගමන්මගේ රඟපෑ 18 වැනි සිනමා නිර්මාණය වේ. තිරගතවීමට නියමිත හා නිෂ්පාදන කටයුතු අවසන් අදියරේ පවතින සිනමාපට 08 කි. 2012 වසරේ ‘සුපර් සික්ස්’ චිත්‍රපටයෙන් සිනමාවට අවතීර්ණ වූ හේමාල් රණසිංහ 2020 වසර වනවිට චිත්‍රපටයක ප්‍රධාන චරිතය රඟපෑම වෙනුවෙන් මෙන්ම වෙළෙඳ දැනේවීමක පෙනී සිටීම වෙනුවෙන්ද වැඩිම මිල අය කරන ශ්‍රී ලාංකේය නළුවා වේ.