ඉන්දීය හිටපු අග්රාමාත්ය රජීව් ගාන්ධි ඝාතනයට වරදකරුව සිට නිදහස ලබා, සිය බව බැලීමට මෙරටට පැමිණීමට සූදානමින් සිටිය දී ජීවිතක්ෂයට පත් වූ ටී.සුරේන්ද්ර රාජා නොහොත් සාන්තන්ගේ අවසන් කටයුතු යාපනය – වැල්වැටිතුරෙයි ප්රදේශයේ දී සිදුකිරීමට නියමිත බව වාර්තා වනවා.
වකුගඩු රෝගයකට ගොදුරු වීමෙන් අනතුරුව ඉන්දියාවේ චෙන්නායි නුවර රජීව් ගාන්ධි රෝහලේ ප්රතිකාර ලබමින් සිටිය දී මිය ගිය සාන්තන්ගේ මෘත දේහය ඊයේ (01) මෙරටට රැගෙන ආවා.
මේ අතර ඔහුගේ දේහය මේ වනවිට මීගමුව රෝහලේ තැන්පත්කර ඇති බවයි තොරතුරු වාර්තා වුණේ.
එහිදී පශ්චාත් මරණ පරීක්ෂණය සිදුකිරීමෙන් පසු මෘත දේහය ඥාතීන්ට භාරදීමට නියමිතව තිබෙනවා.
ඉන්දියාවේ චෙන්නායි නුවර සිට ශ්රී ලන්කන් ගුවන් සේවයේ යූ.එල්.- 122 දරණ ගුවන් යානයෙන් කටුනායක ගුවන් තොටුපොළ වෙත එම සිරුර රැගෙන ආ බවයි ගුවන්තොටුපොළ අප වාර්තාකරු සඳහන් කළේ.
රජීව් ගාන්ධි ඝාතනයට වරදකරුව සිට නිදහස හිමිවීමෙන් පසු සාන්තන්ගේ අවසන් ඉල්ලීම වුණේ යාපනය ප්රදේශයේ ජීවත්වන සිය මව සමඟ තමන්ගේ අවසන් සමය ගතකිරීමට අවසරය ලබාදෙන ලෙසයි.
ඒ, අනුව එම ඉල්ලීමට ඉන්දීය ශ්රේෂ්ඨාධිකරණය විසින් අවසර ලබා දී තිබූ අතර, ඔහුට මෙරටට පැමිණීමට ශ්රී ලංකා බලධාරීන් ද අවසර ලබා දී තිබුණා.
මෙම මාසයේ දී මෙරටට පැමිණීමට නියමිතව සිටි සාන්තන් පසුගිය 28 වනදා ජීවිතක්ෂයට පත් වූ බවයි වාර්තා වුණේ.
සාන්තන්ගේ මරණය ගැටළුවක් බව සාන්තන් වෙනුවෙන් පෙනී සිටි නීතිඥයින් සඳහන් කළ අතර, ඔහුගේ මරණය සැක සහිත බව ද සඳහන් කර සිටියා.
රජීව් ගාන්ධි ඝාතන සැකකරුවන් වූ නලිනි, මුරුගන් ඇතුළු පිරිසක් ද, දකුණු ඉන්දීය දේශපාලන ක්රියාකාරීන් පිරිසක් ද චෙන්නායිහි දී සාන්තන්ගේ මෘත දේයට වෙනුවෙන් අවසන් ගෞරව දක්වා තිබුණා.
