අභාවප්‍රාප්ත ද්‍රවිඩ ජාතික සන්ධානයේ හිටපු නායක ආර්. සම්පන්දන්ගේ දේහය හෙට (05) යාපනයෙන් ත්‍රිකුණාමලයට රැගෙන යාමට නියමිත ව තිබෙනවා.
එම දේහය ඊයේ (03) පස්වරුව වන තෙක් පාර්ලිමේන්තුවේ අවසන් ගෞරව සඳහා පාර්ලිමේන්තු පරිශ්‍රයේ තබා තිබුණා.
ඉන් පසුව දේහය අද (04) උදෑසන කොළඹ සිට යාපනය දක්වා රැගෙන යාම ආරම්භ කර ඇති බවයි වාර්තා වන්නේ.
ආර්. සම්පන්දන් යනු දෙමළ ජාතික සන්ධානයේ නායකයෙකු මෙන් ම, හිටපු විපක්ෂ නායකවරයෙකු ද වනවා.
උතුරේ ජනතාවගේ අවසන් ගෞරව වෙනුවෙන් අද දින යාපනයට හිටපු පාර්ලිමේන්තු මන්ත්‍රීවරයාගේ දේහය රැගෙන එනු ලැබුවේ ශ්‍රී ලංකා ගුවන් හමුදාවට අයත් විශේෂිත ගුවන් යානයකින් රත්මලන ගුවන් හමුදා කඳවුරේ සිට යි.
එය යාපනය – පලාලි ජාත්‍යන්තර ගුවන් තොටුපොළ වෙතට රැගෙන ඒමටයි ගුවන් හමුදාව විසින් කටයුතු යොදා තිබුණේ.
ඉන් පසුව එම දේහය පලාලි සිට විශේෂ රථ පෙළහැරකින් යාපනය ඉලංගෙයි තමිල් අරුසකච්චි පක්ෂ කාර්යාලයට සහ යාපනය මධ්‍ය මහා විද්‍යාලය අසල පිහිටි තන්දෙයි සෙල්වා ශ්‍රවණාගාරයට රැගෙනවිත් මහජන ගෞරවය සඳහා තැන්පත් කිරීමට පියවර ගෙන තිබෙනවා.
හෙට (05) දිනයේ දී නැවත පලාලි ගුවන්තොටුපොළෙන් ගුවන් හමුදාවට අයත් විශේෂ ගුවන් යානයකින් දේහය ත්‍රිකුණාමලය වෙතට රැගෙන යාමට සූදානම් කර ඇති බවයි අප ප්‍රාදේශීය වාර්තාකරු පැවසුවේ.
