සබරගමුව මහ සමන් දේවාලයේ නව බස්නායක නිළමේවරයා පත් කිරීම එළෙඹෙන පෙබරවාරි මස 11 වනදා සිදුකරන බව බෞද්ධ කටයුතු කොමසාරිස් ජෙනරාල්වරයා පවසනවා.
රජයේ ප්‍රවෘත්ති දෙපාර්තමේන්තුවේ අද (06) පැවැති මාධ්‍ය හමුවකට එක්වෙමින් කොමසාරිස් ජෙනරාල් ආර්.එම්.පී. රත්නායක මේ බව සඳහන් කළා.
මහ සමන් දේවාලයේ කටයුතු වෙනුවෙන් මේ වනවිට තාවකාලික බස්නායක නිළමේවරයෙක් පත් කර ඇති අතර, එම පත් කිරීමට විරෝධය පළකරමින් දේවාලයේ කපුමහතුන් මේ වනවිට විරෝධතාවයක නිරතව සිටිනවා.
විරෝධතාවයේ නිරත දේවාලයේ කපුමහත්වරුන් ඇතුළු කාර්ය මණ්ඩල පවසන්නේ මෙලෙස පත්කර ඇති වැඩබලන බස්නායක නිළමේවරයා පවතින රජයේ හිතවතෙකු බවත්, ඔහු එම තනතුර සඳහා සුදුසුකම් සපුරා නොමැති බවයි.
කෙසේ වෙතත් වැඩබලන බස්නායක නිළමේවරයාගේ පත් කිරීම සිදුකරනු ලැබුවේ නීත්‍යානුකූලව බවයි බෞද්ධ කටයුතු කොමසාරිස් ජෙනරාල්වරයා අද (06) පැවති මාධ්‍ය හමුවේ දී වැඩිදුරටත් සඳහන් කර සිටියේ.
