කඳු තරණයේ ශ්‍රී ලාංකික විශිෂ්ටයකු වන ජොහාන් පිරිස් පසුගියදා ජාත්‍යන්තරය හමුවේ ශ්‍රී ලාංකේය අභිමානය නැවත තහවුරු කිරීමට සමත් වූයේ සියලු මහාද්වීපයන්හි උසම කඳු මුදුන් තරණය කළ පළමු ශ්‍රී ලාංකිකයා බවට පත් වෙමිනි.
මේ සමඟ මෙම දස්කම සිදු කළ ලෝකයේ විශිෂ්ටයින් කිහිපදෙනා අතරට එක් වුණු යොහාන් මින් පෙර කිසිදු ශ්‍රී ලාංකිකයකුට ළඟා වීමට නොහැකි වූ උස් කඳු මුදුන්වල ශ්‍රී ලාංකේය ධජය සිටුවීමට කටයුතු කරනු ලැබුවා.
මහාද්වීප 6ක උසම කඳු මුදුන් තරණය කළ ජොහාන්ගේ අවසාන ඉලක්කය වූයේ උතුරු අමෙරිකාවේ දුෂ්කරම කඳු මුදුන වන ඩෙනාලි (6,190m) තරණය කිරීමයි.
එහිදී සෙල්සියස් අංශක 0ටත් වඩා අඩු සීතල මධ්‍යයේ, දුෂ්කර කාලගුණික තත්ත්වයන්ට මුහුණදෙමින් අධික බරක් ඔසවාගෙන කඳු මුදුන තරණය කිරීමට ද යොහාන්ට සිදු වුණා.
අවසාන ගමනේදී මීටර් 5743ක උසකින් යුත් කඳවුරට ළඟා වූ ඔහුට දරුණු කුණාටු හා හිම කුණාටු හේතුවෙන් ආපසු හැරි යන්නට ද සිදු වූ බවයි විශේෂ මාධ්‍ය හමුවක් පවත්වමින් ඔහු සඳහන් කළේ.
2014 වසරේදී මීටර් 5895ක් වූ අප්‍රිකාවේ කිලිමන්ජාරෝ කඳු මුදුන (Mount Kilimanjaro) තරණය කරමින් සිය ගමන ආරම්භ කළ ඔහු 2016 වසරේදී ආසියාවේ එවරස්ට් කන්ද (Mount Everest) තරණය කිරීමට උත්සාහ ගනු ලැබුවා.
එහෙත් එය අසාර්ථක උත්සාහයක් වුණා.
එහෙත් සිය උත්සාහය අත් නොහළ ජොහාන් 2018 වසරේදී මීටර් 8849 ක එවරස්ට් කඳු මුදුන ජය ගනිමින් තවත් සුවිශේෂී සන්ධිස්ථානයක් සනිටුහන් කිරීමට සමත් වුණා.
