සතොස, වී අලෙවි මණ්ඩලය සහ සමූපකාර ආයතන එක්ව වී මිලදී ගැනීමේ සූදානමක් (වීඩියෝ)

සතොස, වී අලෙවි මණ්ඩලය සහ සමූපකාර ආයතන ඒකාබද්ධව වී මිලදී ගැනීමේ ක්‍රියාවලියක් ඉදිරියේ දී රජය විසින් ආරම්භ කරන බව වෙළඳ හා වාණිජ අමාත්‍ය වසන්ත සමරසිංහ පවසනවා.

සහල් මේට්‍රික් ටොන් පන්ලක්ෂ පනස් දහසකට ආසන්න සහල් තොග ගබඩා කළ හැකි ගබඩා පහසුකම් සතොස හා වී අලෙවි මණ්ඩලය සතු පවතින බවත්, ඒ අනුව සතොස, වී අලෙවි මණ්ඩලය සහ සමූපකාර ආයතන ඒකාබද්ධව වී මිලදී ගැනීමේ ක්‍රියාවලිය ඇරඹීමට තීරණය කර ඇති බවයි අමාත්‍යවරයා සඳහන් කළේ.

මේ අතර ක්‍රම කිහිපයක් ඔස්සේ වෙළඳපොළට සහල් නිකුත් කිරීම සඳහා ආණ්ඩුව විසින් කටයුතු කර ඇති බවත්, පසුගිය දින 10 ඇතුළත දී පමණක් පොළොන්නරුව ප්‍රදේශයේ මෝල් හිමියන් සතුව තිබූ සහල් කිලෝ ලක්ෂ 100කට වැඩිය ප්‍රමාණයක් වෙළඳපොළට නිදහස් කිරීමට රජය මැදිහත් වූ බවත්, වෙළෙඳ අමාත්‍යවරයා වැඩිදුරටත් පැවසුවා.

එමෙන්ම සතොස හරහා මෙට්‍රික් ටොන් 3000කට වැඩි ප්‍රමාණයක් වෙළඳපොළට නිකුත් කිරීමටත්, ආනයනය කිරීම් නිදහස් කිරීම හරහා ඊයේ (20) සවස් වන විට සහල් මෙට්‍රික් ටොන් 65,000ක් වෙළඳපොළට පැමිණ ඇති බවත් ඔහු සඳහන් කර සිටියා.

මේ අතර උත්සව සමයන් තුළ දී භාණ්ඩ හිඟය සහ මිල වැඩිවීම සාමාන්‍යකරණය තත්ත්වයක් වුව ද පාරිභෝගික ජනතාව වෙනුවෙන් සහල් ඇතුළු අනෙකුත් සියලුම පාරිභෝගික භාණ්ඩ මගින් අයතා ලාභ ලබාගැනීමට අවස්ථාව ලබා නොදීමට කටයුතු කරන බවයි ඔහු පැවසුවේ.

පොහොර සහනාධාරය පමා වීම සම්බන්ධයෙන් අදහස් දක්වමින් අමාත්‍යවරයා කියා සිටියේ පසුගිය සතිය ඇතුළත හිඟ පැවැති රුපියල් බිලියන 04කට ආසන්න මුදල්වලින් රුපියල් බිලියන 03ක මුදලක් නිදහස් කළ බවයි.