සංවිධානාත්මක අපරාධ කල්ලි සාමාජිකයෙකු වන හික්කඩුව ලියනගේ සහන් සිසිකැලුම් නොහොත් ‘මිදිගම සහන්’ නැමැත්තා ඉන්දියාවේ සිට මෙරටට පැමිණෙමින් සිටිය දී අත්අඩංගුවට ගෙන තිබෙනවා.
ඊයේ (28) රාත්‍රියේ කටුනායක ගුවන් තොටුපොළ පැමිණීමේ පර්යන්තයේ දී අපරාධ පරීක්ෂණ දෙපාර්තමේන්තු නිලධාරීන් පිරිසක් විසින් අත්අඩංගුවට ගෙන ඇති බවයි වාර්තා වුණේ.
32 හැවිරිදි මොහු වැලිගම ප්‍රදේශයේ පදිංචිකරුවෙකු වන අතර මොහු මාතර සහ පානදුර පොලිස් බල ප්‍රදේශ තුළ මිනීමැරුම් , මංකොල්ලකෑම් විශාල ප්‍රමාණයක් සිදුකර ඇති සංවිධානාත්මක අපරාධකරුවෙක් වනවා.
එමෙන්ම මොහු වනවිට අත්අඩංගුවේ සිටින හරක්කටාගේ ගෝලයෙකුවන අතර ‘මිදිගම චූටි’ නැමති සංවිධානාත්මක අපරාධකරුගේ ද සමීපතමයෙකු ලෙස කටයුතු කළ අයෙක්.
ඉන්දියාවේ චෙන්නායි නුවර සිට ඉන්ඩිගෝ ගුවන් සේවයේ 6 ඊ. – 1173 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
වැඩිදුර විමර්ශන කටයුතු සහ ඉදිරි නීතිමය ක්‍රියාමාර්ග සදහා සැකකරු කළුතර අපරාධ කොට්ඨාශය වෙත භාරදීමට පියවර ගෙන තිබෙනවා.
