සංවර්ධන ලොතරැයි මණ්ඩලය මගින් පසුගිය වසරේ ත්‍යාග ලෙස රුපියල් බිලියන 10ක මුදලක් ජයග්‍රහකයින්ට ලබාදී ඇති බව එහි සභාපති N.K.A.ගුණරත්න නාරගල මහතා පවසනවා.
සංවර්ධන ලොතරැයි මණ්ඩලය මගින් දිනපතා විශාල දිනුම් ත්‍යාග ජනතාව වෙනුවෙන් පිරිනමන අතර පසුගිය වසරේ දී රුපියල් බිලියන 19ක වාර්ෂික පිරිවැටුමක් වාර්තා කිරීමට හැකිවූ බවයි සභාපතිවරයා සඳහන් කළේ.
ඉන් ජයග්‍රහකයින් සඳහා ත්‍යාග මුදල් වශයෙන් රුපියල් බිලියන 10ක මුදලක් ලබාදීමට සංවර්ධන ලොතරැයි මණ්ඩලයට හැකිවූ බව N.K.A.ගුණරත්න නාරගල මහතා කියා සිටියා.
දෛනික ටිකට් පත් අලෙවිය ලක්ෂ 35 දක්වා වැඩි කිරීමට ලොතරැයි මණ්ඩලයට හැකි වී ඇති අතර ඉදිරියේදී බිලියන දහයකට වැඩි වූ මුදල් ලබාදීමට අපේක්ෂා කරන බවයි ඔහු පැවසුවේ.
සංවර්ධන ලොතරැයි මණ්ඩලයේ ජයග්‍රහණයකින් වෙනුවෙන් චෙක් පත් ප්‍රදානය කිරිම සඳහා අනුරාධපුර දිස්ත්‍රික් ලේකම් කාර්යාල පරිශ්‍රයේදී පැවැති උත්සවයකට එක්වෙමින් ලොතරැයි මණ්ඩල සභාපතිවරයා මෙම අදහස් පළකලා.
මෙම අවස්ථාවට ප්‍රධාන ආරාධිතයා ලෙස මුදල් රාජ්‍ය අමාත්‍ය ෂෙහාන් සේමසිංහ ද සහභාගී වුණා.
මුදල් රාජ්‍ය අමාත්‍ය ෂෙහාන් සේමසිංහ මෙහිදී අදහස් පළ කරමින් කියා සිටියේ සංවර්ධන ලොතරැයි මණ්ඩලය විසින් රජයට ලබාදෙන සහයෝගය ඉතා වටිනා බවයි.
ජනතාව ලබා දෙන බදු මුදල්වලින් රජයේ ආයතනයක් පවත්වාගෙන යාමට ජනතාව විරුද්ධ බැවින් එම ආයතන ප්‍රතිව්‍යුහගත කිරීමට කටයුතු කරන අතර අදාළ ආයතනවලට භාණ්ඩාගාරයේ මුදල් ලබාදීම සිදු නොකරන බවයි ඔහු ප්‍රකාශ කළේ.
