අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ශානි අබේසේකර සහ උප පොලිස් පරීක්ෂක සුගත් මෙන්ඩිස් යන මහත්වරුන් ගම්පහ මහාධිකරණය හමුවේ ඇප කොන්දේසි සම්පූර්ණ කර තිබේ.
ඊයේ (16) දිනයේ අභියාචනාධිකරණය ඔවුන්ට නියම කළ ඇප කොන්දේසි අද දිනයේ එලෙස සම්පූර්ණ කළ බව ‘අද දෙරණ’ අධිකරණ වාර්තාකරු සඳහන් කළේය.
ඒ අනුව ශානි අබේසේකර මහතා මුදා හරින ලෙස වැලිකඩ බන්ධනාගාර අධිකාරීවරයාටත්, සුගත් මෙන්ඩිස් මහතා මුදාහරින ලෙස මහර බන්ධනාගාර අධිකාරීවරයාටත් ගම්පහ මහාධිකරණ විනිසුරුවරයා නියෝග කර තිබේ.
අභියාචනාධිකරණ විනිසුරු නිශ්ශංක බන්දුල කරුණාරත්න සහ රත්නප්රිය ගුරුසිංහ යන මහත්වරුන් සැකකරුවන් දෙදෙනාගෙන් එක් අයෙකුට රුපියල් 25,000 බැගින් වූ මුදල් ඇප සහ රුපියල් ලක්ෂ 10 බැගින් වූ ශරීර ඇප 2ක් මත මුදාහරින ලෙස නියෝග කර තිබුණි.
එම මුදල් සහ ශරීර ඇපවලට අමතරව සැකකරුවන් දෙදෙනාගේ ගුවන් ගමන් බලපත්ර ගම්පහ මහාධිකරණයට ඉදිරිපත් කරන ලෙස ද අභියාචනාධිකරණ නියෝගයේ සඳහන් වේ.
ඒ අනුව අද දිනයේ ශානි අබේසේකර මහතාගේ ඇපකරුවන් ලෙස ඒ මහතාගේ සොහොයුරන් දෙදෙනෙක් සහ සුගත් මෙන්ඩිස් මහතාගේ ඇපකරුවන් ලෙස ඒ මහතාගේ බිරිඳ සහ පුත්රයා ඇප කොන්දේසි සපුරාලීමට කටයුතු කර තිබේ.
අසත්ය සාක්ෂි නිර්මාණය කර අධිකරණය නොමඟ යැවීමේ චෝදනා සම්බන්ධයෙන් අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ශානි අබේසේකර සහ ඇඹිලිපිටිය පොලීසියට අනියුක්තව සේවය කළ සුගත් මෙන්ඩිස් යන සැකකරුවන් දෙදෙනා මාස 10 කට අධික කාලයක් රක්ෂිත බන්ධනාගාර ගත කර තිබුණි.
