කටුනායක ගුවන් තොටුපොළ වෙත පැමිණි ශ්රී ලන්කන් ගුවන් යානා 03ක් තාක්ෂණික දෝෂවලට ලක් වීම හේතුවෙන් ගුවන් ගමන්වාර කිහිපයක් අවලංගු කර තිබෙනවා.
ඊට අමතරව තවත් ගුවන් ගමනවාර කිහිපයක් ප්රමාදවීම්වලට ලක්ව ඇති බවයි ශ්රී ලන්කන් ගුවන් සේවය සඳහන් කළේ.
සෑම ගුවන් යානයක්ම තම ගුවන් ගමන නිමා කිරීමෙන් පසු තාක්ෂණික ඇගැයීම් පරීක්ෂා කිරීමකට ලක් කෙරෙන අතර , එහිදී ඇතැම් ගුවන් යානාවල සිදුකළ යුතු අත්යාවශ්ය තාක්ෂණික නඩත්තු කිරීම් සඳහා, තරමක කාලයක් ගතවන බවත් , ඒ අනුව මෙම ගුවන් යානා 03 එම තාක්ෂණික නඩත්තු කටයුතු සඳහා යොමුකර ඇති බව ද ගුවන් සමාගමේ ප්රකාශකයෙක් පැවසුවා.
ඒ අනුව අද (17) දින පස්වරු 06.35 ට ඉන්දියාවේ චෙන්නායි බලා පිටත්ව යාමට නියමිත ශ්රී ලන්කන් ගුවන් සේවයේ යූ.එල්.- 123 දරන ගුවන් ගමන සහ යළිත් රාත්රී 10.15ට චෙන්නායි සිට කටුනායක වෙත පැමිණීමට නියමිත ශ්රී ලන්කන් ගුවන් සේවයේ යූ.එල්.- 124 ගුවන් ගමන අවලංගු කර තිබෙනවා.
මීට අමතරව අද (17) රාත්රී 10.10ට ඉන්දියාවේ නවදිල්ලි නුවර සිට කටුනායක ගුවන් තොටුපොළ වෙත පැමිණීමට නියමිත ශ්රී ලන්කන් ගුවන් සේවයේ යූ.එල්.- 196 දරන ගුවන් යානය සහ ඕස්ට්රේලියාවේ මෙල්බර්න් නුවර සිට අද දින රාත්රී 10.20 ට කටුනායක ගුවන් තොටුපොළ වෙත පැමිණීමට නියමිත ගුවන් යානය ද අවලංගු කර ඇති බවයි වාර්තා වන්නේ.
එමෙන්ම හෙට (18) දින අලුයම 12.00න් පසු ක්රියාත්මක වීමට නියමිත තවත් ශ්රී ලන්කන් ගුවන් ගමන් වාර කීපයක් අවලංගු කිරීමට සහ ප්රමාද වීමට නියමිත බවයි වැඩිදුරටත් තොරතුරු වාර්තා වුණේ.
මේ පිළිබඳ ශ්රී ලන්කන් ගුවන් සේවය මෙම ගුවන් යානාවලින් ගමන් පහසුකම් සළසා ගන්නා මගීන් දැනුවත් කිරීමට පියවර ගෙන තිබෙනවා.
ඒ, අනුව කඩිනමින් මෙම ගුවන් ගමන්වල නිරත වීමට අවශ්ය ගුවන් මගීන් වෙනත් විකල්ප ගුවන් යානා මගින් එම ගමනාන්තයන් වෙත යොමු කිරීමට ද ශ්රී ලන්කන් ගුවන් සේවය පියවර ගෙන ඇති බවයි වාර්තා වුණේ.
