ශ්රී ලංකා මානව හිමිකම් කොමිෂන් සභාව විසින් ජනාධිපති අනුර කුමාර දිසානායක වෙත මහජන ආරක්ෂක ආඥා පනතේ 12 වැනි වගන්තිය ප්රකාරව ලැබී ඇති විශේෂ බලතල සම්බන්ධයෙන් වන ලිපියක් යොමු කර තිබෙනවා.
ශ්රී ලංකා මානව හිමිකම් කොමිෂන් සභාව සිය ලිපියෙහි දක්වා ඇත්තේ නව ජනාධිපතිවරයා වශයෙන් පත් වූ අනුර කුමාර දිසානායක මහතා හට පළමුව කොමිෂන් සභාවේ සුබාශිංසන පිරිනමන බවයි.
මහජන ආරක්ෂක ආඥා පනතේ 12 වැනි වගන්තිය යටතේ නිකුත් කරන ලද 2024 සැප්තැම්බර් මස 26 වැනි දිනැති අංක 2403/47 දරණ අතිවිශේෂ ගැසට් පත්රයේ පළ කරන ලද නියෝග පිළිබඳව කොමිෂන් සභාව සිය අදහස් ජනාධිපතිවරයා වෙත මෙම ලිපියෙන් ඉදිරිපත් කර තිබෙනවා.
එකී නියෝගය මගින් මෙම වසරේ සැප්තැම්බර් 27 වැනි දින මාසයක කාලයක් සඳහා ශ්රී ලංකාවේ සෑම පරිපාලන දිස්ත්රික්කයකම මහජන සාමය පවත්වාගෙන යාම සඳහා ශ්රී ලංකා යුද හමුදාවේ, ශ්රී ලංකා නාවික හමුදාවේ හා ශ්රී ලංකා ගුවන් හමුදාවේ සියලුම සාමාජිකයින් කැඳවා තිබෙන බව ද එම ලිපියෙහි සඳහන්.
1996 අංක 21 දරණ ශ්රී ලංකා මානව හිමිකම් කොමිෂන් සභා පනතේ 10 (ඈ) වගන්තිය ප්රකාරව ජාත්යන්තර මානව හිමිකම් නියමයන්ට හා ප්රමිතීන්ට අනුකූලව රජයක් විසින් පරිපාලන ක්රියාමාර්ග ගනු ලබන බව සහතික කිරීම සඳහා අනුගමනය කළ යුතු පියවර සම්බන්ධයෙන් රජයට නිර්දේශ ඉදිරිපත් කිරීම සඳහා කොමිෂන් සභාව වෙත බලතල පැවරී ඇති බවයි ජනාධිපතිට නිකුත් කළ ලිපියෙහි දැක්වෙන්නේ.
ශ්රී ලංකා මානව හිමිකම් කොමිෂන් සභාවේ සභාපති (විශ්රාමික) හිටපු ශ්රේෂ්ඨාධිකරණ විනිසුරු එල්.ටී. බී දෙහිදෙණිය මහතාගේ අත්සනින් යුතුව නිකුත් කළ මෙම විශේෂ ලිපිය මගින් මහජන සාමය අඛණ්ඩව පවත්වාගෙන යාම සඳහා අවශ්ය කරුණු කාරණා සම්බන්ධයෙන් මහජන ආරක්ෂක ආඥා පනතේ 12 (1) වගන්තිය වෙත ජනාධිපතිවරයාගේ අවධානය යොමු කිරීමටයි පියවර ගෙන ඇත්තේ.
